Шаноўныя сябры! Шаноўныя паплечнікі!

Ад імя Згуртавання беларусаў свету “Бацькаўшчына” віншуем вас з 25-гадовым юбілеем!  Таварыства “Сьвітанак”  пачало дзейнічаць  ў далёкім 1988 годзе адным  з першых на постсавецкай прасторы і было першай  арганізацыяй нацыянальнай меншасці ў Латвіі!

Шмат усяго было зроблена, каб беларусы не забыліся на прыналежнасць да гістарычнай Радзімы, каб не расцерушыліся жыццёвай завірухай. І тым больш сёлетні юбілей  - важная, значная  з’ява беларускага жыцця ў замежжы! 

Ваша таварыства з’яўляецца годным духоўным спадчыннікам Латвійскага культурна-асветніцкага таварыства “Бацькаўшчына”, якое паўстала яшчэ ў 1921 годзе і спрыяла актыўнаму культурнаму беларускаму жыццю ў Латвіі.

За чвэрць стагоддзя дзейнасці  “Сьвітанак” стаў сапраўдным сімвалам любові і павагі беларусаў да сваёй культуры, традыцыі і гісторыі. Дзякуючы Таварыству, у Рызе запрацавала беларуская асноўная школа, якая актыўна дапамагае новаму пакаленню беларусаў памятаць, хто яны і адкуль. Таварыства “Сьвітанак” спрыяла з’яўленню Аб’яднання мастакоў-беларусаў Балтыі “Маю гонар”, а таксама садзейнічала таму, каб беларуская мова загучала на хвалях Латвійскага радыё. Выставы і канцэрты, фестывалі, навуковыя  даследаванні – усё гэта з года ў год ладзіць “Сьвітанак”, аб’ядноўваючы беларусаў і папулярызуючы нашую культуру сярод іншых народаў Латвіі.

Асобна трэба адзначыць, што Таварыства беларускай культуры “Сьвітанак” стала ўзаемадзейнічае з беларускімі дыяспарамі іншых краін і, безумоўна, трымае моцную сувязь з Беларуссю.

Дарагія сябры! Управа МГА “ЗБС “Бацькаўшчына” дзякуе вам за дзейнасць, за гонар працаваць разам з вамі. Шчыра віншуем вас з юбілеем! Зычым моцы, натхнення і плёну ў вашай годнай і нялёгкай справе, а таксама здароўя і аптымізму! Няхай агеньчык беларушчыны ніколі не згасне ў вашых сэрцах!

Управа МГА “ЗБС “Бацькаўшчына”