Віншуем Івонку Сурвіллу!

11 красавіка юбілей святкуе сябра Вялікай Рады Згуртавання беларусаў свету “Бацькаўшчына”, старшыня Рады Беларускай Народнай Рэспублікі Івонка Сурвілла.

11 красавіка юбілей святкуе сябра Вялікай Рады Згуртавання беларусаў свету “Бацькаўшчына”, старшыня Рады Беларускай Народнай Рэспублікі Івонка Сурвілла.

Управа МГА “ЗБС “Бацькаўшчына” шчыра віншуе шаноўную спадарыню Івонку са святам і жадае моцнага здароўя, доўгіх год жыцця, нязгаснага аптымізму, надзейных паплечнікаў, далейшых поспехаў у працы на карысць Беларусі.

Віншавальнае слова з нагоды Дня нараджэння Івонкі Сурвіллы даслала з Канады вядомая беларуская пісьменніца Вольга Іпатава. З задавальненнем публікуем яго і далучаемся да цёплых словаў.

Управа МГА “ЗБС “Бацькаўшчына”

Да дня нараджэння Івонкі Сурвіллы

Гэтая жанчына з самай першай сустрэчы выклікае ў маёй душы  гарачае, шчырае захапленне. І талентам мастачкі, што скончыла Сарбону, і адукаванасцю (ведае восем моваў), і прыязнасцю  да людзей і свету, і светлым, ясным розумам.

А яшчэ яна – Старшыня Рады Беларускай Народнай Рэспублікі  -- урада ў выгнанні, які пранёс гарачую веру ў незалежнасць Беларусі і працаваў дзеля гэтага ўсе гады свайго нялёгкага лёсу.

Спробы вынішчыць  і тым выкінуць на сметнік Гісторыі выказаную волю народа да свабоды працягваліся ўсё мінулае стагоддзе і асабліва ў пасляваенныя гады. БНР спрабавалі пахаваць пад манбланамі хлусні і фальсіфікацый. Але і па-за межамі Беларусі Рада працягвала сваю барацьбу. Мяняліся яе старшыні, але нязменным быў яе клопат аб тым, каб захаваць  родную мову і культуру і ў рэшце рэшт дабіцца незалежнасці краіны. Гэта яна, пасляваенная беларуская эміграцыя, на ўвесь свет заяўляла аб генацыдзе нацыі і тым стрымлівала  шалёны наступ на ўсё беларускае.

Дзяўчынка з–пад Стоўпцаў, якую бацькі вывезлі на чужыну, ратуючыся ад бальшавікоў, вырасла ў атмасферы любові і шчырай працы дзеля Бацькаўшчыны.

І гэтаму яна прысвяціла ўсё сваё жыццё.

Івонка Сурвілла -- яркая, таленавітая, светлая асоба. Пра такіх кажуць, што на іх  – знак Божае ласкі.

Івонка Сурвілла – гэта твар той Беларусі, якую мы любім і шануем.

Вольга Іпатава, пісьменніца