Маладзёвая ініцыятыва StudAlliance у межах грамадскай кампаніі  “Будзьма беларусамі” разам з Еўрапейскім гуманітарным універсітэтам, Згуртаваннем беларусаў свету “Бацькаўшчына” зладзілі прэзентацыю новага праекта Лявона Вольскага “Белая яблыня грому” ў Вільні.

17 красавіка шанец адкрыць для сябе беларускія літаратурныя скарбы ў інтэрпрэтацыі Лявона Вольскага атрымалі студэнты Еўрапейскага гуманітарнага універсітэта, а таксама шматлікія жыхары Вільні.

Апоўдні ў навучальным корпусе ЕГУ адбылася творчая сустрэча Вольскага са студэнтамі і абітурыентамі ЕГУ, дзе закраналіся самыя розныя пытанні пра творчасць спевака, новую творчую каманду, саму ідэю праекта, яго сутнасць і пра іншыя цікавыя аспекты працы.

Усе ахвотныя маглі сфатаграфавацца і ўзяць аўтограф у знакамітага беларускага выканаўцы. Да таго ж, Лявон Вольскі зазначыў, што, магчыма, параіць сваёй дачцэ паступаць у ЕГУ.

А ўвечары унікальны і наватарскі праект з 12 песняў  на словы хрэстаматыйных беларускіх паэтаў быў прэзентаваны ў адным з віленскіх клубаў. На прэзентацыю сабралася каля дзвюх соцень чалавек. Канцэрт складаўся з дзвюх частак: уласна прэзентацыі альбому “Белая яблыня грому” і выканання мадыфікаванай версіі “Крамбамбулі”. Былі раздадзеныя падарункі ад грамадскай кампаніі “Будзьма беларусамі!”, а кампакт-дыскі “ Белай яблыні…” былі выстаўленыя на продаж па спецыяльным, зніжаным  кошце.

Канцэрт адбыўся ў добрай, цёплай атмасферы і на пазітыўнай хвалі. Музыкаў вельмі доўга не хацелі адпускаць са сцэны. Альбо гэта гурт не жадаў пакідаць гледачоў? Хутчэй за ўсё, гэта было ўзаемнае пачуццё.

Прэс-служба Маладзёвай ініцыятывы StudAlliance

Фота: Алена Міхайлава