11 красавіка юбілей святкуе Івонка Сурвілла!

11 красавіка юбілей святкуе сябра Вялікай Рады Згуртавання беларусаў свету „Бацькаўшчына“, старшыня рады Беларускай Народнай Рэспублікі Івонка Сурвілла.

Усмешка гэтай жанчыны знаёмая кожнаму, хто аднойчы зацікавіўся лёсам БНР. А ейны жыццёвы шлях – адзін з найяскравых прыкладаў таго, што любоў да Беларусі і праца на яе карысць нават у самых безнадзейных сітуацыях і ў самых аддаленых ад Радзімы мясцінах свету апынаюцца недарэмнымі, прыносяць добры плён і саграюць удзячнасцю. Лёс спадарыні Івонкі Сурвіллы – гэта прыклад таго, як беларушчына здольная апанаваць, абудзіць самаахвярнасць і зрабіцца лёсам чалавека, які ў Беларусі нават не паспеў пажыць, – у эміграцыі Івонка Сурвілла апынулася ва ўзросце 8 гадоў.

Пра энергічнасць, арганізатарскія здольнасці і дысцыпліну спадарыні Івонкі на гэтай ніве сведчыць кожны, хто меў гонар зведаць супрацу з ёй. Але і просты сухі пералік ініцыятываў, аўтаркай якіх яна з’яўлялася, а таксама тых пасадаў, якія яна займала ў розныя гады, уражвае.

У 1959–1965 гадах гэта была праца на Іспанскім нацыянальным радыё, дзе разам з мужам яна рыхтавала беларускамоўныя перадачы. Пазней спадарыня Івонка была старшынёй Каардынацыйнага камітэту беларусаў Канады. У 1974 годзе – старшынёй Беларускага інстытута навукі і мастацтва ў Канадзе. У 1984 годзе спадарыня Івонка ўвайшла ў склад праўлення Канадскай этнакультурнай Рады. У 1989 годзе была сярод арганізатараў Фонда дапамогі ахвярам Чарнобылю ў Беларусі, які ўзначальвала да самага абрання старшынёй Рады БНР у 1997 годзе. Фонд займаўся зборам дапамогі для беларускіх шпіталёў і арганізоўваў адпачынкі для дзяцей з пацярпелых ад радыяцыі раёнаў.

За спрыянне ў станаўленні дэмакратыі ў Беларусі Івонка Сурвілла ў 2013 годзе была ўганаравана Медалём Брыльянтавага юбілею Каралевы Лізаветы II.

Шаноўная спадарыня Івонка! Ад усёй душы віншуем Вас з юбілеем! Зычым Вам моцнага здароўя, паплечнікаў, не менш за Вас энергічных і адданых Беларусі, а таксама новага плёну ў Вашай працы на беларускай ніве!

Інфармацыйны цэнтр МГА „ЗБС „Бацькаўшчына“