Гомельскі гісторык, кандыдат мастацтвазнаўчых навук Яўген Малікаў заклікае выратаваць ад разбурэння гарадзішча мілаградскай культуры «Шведскую горку».
На электроннай гандлёвай пляцоўцы ўпраўленне капітальнага будаўніцтва аб’явіла адкрыты конкурс на «Праект забудовы мікрараёна № 59А ў Гомелі». Будаўніцтва мяркуецца ў непасрэднай блізасці ад помніка археалогіі. У апісанні лота не паказана, што меркаваны мікрараён будзе прымыкаць да гарадзішча жалезнага веку, у якога не вызначаны межы ахоўных зон.
Яўген Малікаў ужо напісаў зварот, які можна падтрымаць і ўслед за гісторыкам даслаць у адпаведныя ўстановы. «Зараз вельмі важна, каб кожны гамяльчанін, якому неабыякава захаванне гэтага помніка для наступных пакаленняў, напісаў зварот да мясцовых уладаў», — заклікае кандыдат мастацтвазнаўчых навук.
Шведская горка — гарадзішча жалезнага веку 6-2 ст. да нашай эры. Навукоўцы адносяць яго насельнікаў да мілаградскай археалагічнай культуры. Лічыцца, што «мілаградцы» адносіліся да балтамоўных народаў. Хутчэй за ўсё, менавіта яны былі носьбітамі днепра-окскай мовы. Ёсць меркаванне, што калі бацька гісторыі Герадот пісаў пра народ ваўкалакаў неўраў, то меў на увазе менавіта «мілаградцаў».
