Праект складаецца з кнігі вершаў Рыгора Барадуліна ў аздабленні фотаздымкаў Джона Кунстадтэра і музычнага дыска. На ім псалмы на вершы Рыгора Барадуліна, праспяваныя Алесем Камоцкім.

Творчы тандэм Алеся Камоцкага, Рыгора Барадуліна, Джона Кунстадтэра заявіў пра сябе стварэннем кнігі вершасказаў Рыгора Барадуліна “Навошта”. Нядаўна да гэтага тандэму далучыўся аранжыроўшчык і піяніст Аляксандр Віслаўскі. У выніку атрымаўся праект пад назвай “Вяровіца Алеся Камоцкага складзеная з вершаў Рыгора Барадуліна і фотаздымкаў Джона Кунстадтэра пры музычным аздабленні Аляксандра Віслаўскага”.

Праект складаецца з кнігі вершаў Рыгора Барадуліна ў аздабленні фотаздымкаў Джона Кунстадтэра і музычнага дыска. На ім псалмы на вершы Рыгора Барадуліна, праспяваныя Алесем Камоцкім. Фактычна гэты матэрыял пабачыў свет 12 гадоў таму і існаваў у выглядзе чарнавых запісаў. Цяпер дзякуючы Аляксандру Віслаўскаму гэтыя песні набылі новае гучанне, як сказаў Алесь Камоцкі, сталі больш “слухабельнымі”.

Алесь Камоцкі

Прэзентацыя “Вяровіцы” адбылася 24 сакавіка ў Музеі Янкі Купалы ў Мінску. Дарэчы, прэзентацыя кнігі “Навошта” таксама праходзіла ў Купалавым доме, як называюць музей яго супрацоўнікі. Адкрыла вечарыну дырэктарка музея Алена Мацевасян. Яна выказала надзею, што паспяхова распачатае супрацоўніцтва з таленавітымі творцамі працягнецца і надалей. Спадарыня Алена паведаміла, што 11 чэрвеня плануецца правесці выставу фотаздымкаў Джона Кунстадтэра ў філіяле музея Янкі Купалы ў Вязынцы. Адкрыццё выставы будзе прымеркавана да падвядзення вынікаў конкурсу аўтарскай песні “Купалаўскія вакацыі”. Алена Мацевасян перадала праз Алеся Камоцкага Рыгору Барадуліну “Пасведчанне сябра музею”. Сам дзядзька Рыгор крыху прыхварэў і таму не змог прыйсці на вечарыну.

Падзяку Алесю Камоцкаму за апекаванне Рыгорам Барадуліным выказаў Уладзімір Сіўчыкаў, кіраўнік выдавецтва “Радыёла Плюс”, у якім выйшла кніга “Вяровіца”. Ён адзначыў, што ганарыцца тым, што “Вяровіца” выйшла ў ягоным выдавецтве.

Падчас вечарыны Алесь Камоцкі праспяваў некалькі псалмоў з “Вяровіцы”, а таксама парадаваў песнямі з ранейшых альбомаў.

Прысутны на прэзентацыі Джон Кунстадтэр адзначыў, што свамі фотаздымкамі ён хацеў бы выказаць пашану новаму нараджэнню веры ў беларускім народзе, а таксама тым людзям, якія перадаюць свае традыцыі новаму пакаленню. У архіве Джона Кунстадтэра больш за 20 тысяч фотаздымкаў, зробленых у Беларусі. Так што Алесю Камоцкаму прыйшлося весці зусім няпросты адбор, але ён прайшоў гэтае выпрабаванне з гонарам. На кожнай старонцы “Вяровіцы” змешчана па два фотаздымкі. У іх спалучэнні схаваны свой таемны сэнс. Кожны, хто будзе гартаць кнігу, раскрые яго па-свойму.

Вечарына прайшла ў межах кампаніі “Будзьма беларусамі!”.

Джон Кунстадтэр

Удельнікі імпрэзы, на першым шэрагу -- Уладзімір Сіўчыкаў і Алена Мацевасян

Інфармацыйны цэнтр МГА “ЗБС “Бацькаўшчына”