У Беларусі да 2020 года будуць поўнасцю ўведзены ў дзеянне два блокі атамнай электрастанцыі. Аб гэтым паведаміў карэспандэнту БЕЛТА намеснік міністра энергетыкі Беларусі Юрый Рымашэўскі.
Сёння на Беларускім энергетычным і экалагічным кангрэсе ён выступіў з дакладам аб стратэгіі развіцця энергетычнага патэнцыялу краіны. У дакладзе было прадстаўлена, што да 2020 года будуць уведзены два блокі АЭС агульнай сумарнай магутнасцю 2340 МВт. Намеснік міністра энергетыкі таксама адзначыў, што стратэгіяй развіцця энергетычнага патэнцыялу Беларусі за наступныя 5 гадоў і на перыяд да 2020 года прадугледжана ўвядзенне ў эксплуатацыю новых энергетычных магутнасцей, у тым ліку на ядзерным паліве.
