Кітай гатовы прадаставіць Беларусі крэдыт у $5,7 млрд. Аб гэтым паведаміў 28 снежня на нарадзе ва ўрадзе намеснік прэм'ер-міністра Беларусі Андрэй Кабякоў. "Кітайскія партнёры сёння прапануюць нам каля $5,7 млрд. крэдытных рэсурсаў, якія з'яўляюцца патэнцыяльнымі інвестыцыямі ў асноўны капітал, - сказаў віцэ-прэм'ер. - Адпаведнае пагадненне падпісана на мінулым тыдні ў Кітаі". Кітайскім бокам папярэдне акцэптаваны 14 праектаў, з іх 3 - у транспартнай сферы, 8 - у галіне энергетыкі, 2 - у сферы тэлекамунікацый і 1 - па будаўніцтву комплексу да чэмпіянату свету па хакею 2014 года. "Хуткасць прыцягнення гэтых рэсурсаў залежыць толькі ад кемлівасці пазычальнікаў і гатоўнасці праектаў, - падкрэсліў Андрэй Кабякоў. - Недастаткова толькі прыцягнуць замежныя інвестыцыі - неабходна прыняць усе магчымыя меры для адлюстравання іх на балансе прадпрыемства. Толькі тады іх можна будзе разглядаць як інвестыцыі ў асноўны капітал". Намеснік прэм'ер-міністра нагадаў, што тэмп росту інвестыцый у асноўны капітал у 2010 годзе чакаецца на ўзроўні 123-125 працэнтаў да 2009 года. У эканоміку краіны плануецца накіраваць за кошт усіх крыніц фінансавання каля Br61 трлн. інвестыцый. З названых крыніц не выклікаюць пытанняў, у першую чаргу, сродкі кансалідаванага бюджэту - Br10,9 трлн. Адпаведныя рэсурсы прадугледжаны ў бюджэце на рэалізацыю Дзяржаўнай інвестыцыйнай праграмы (Br2,15 трлн.), будаўніцтва жылля (Br2,9 трлн.), выкарыстанне інавацыйных фондаў (каля Br3 трлн.), на выкананне іншых дзяржпраграм. Уласныя сродкі арганізацый пралічваюцца ў аб'ёме Br21,3 трлн. з улікам існуючага аб'ёму ў гэтым годзе (Br16,6 трлн.) і плануемага тэмпу росту эканомікі ў 2010 годзе (112-113 працэнтаў). Крэдыты банкаў прадугледжваюцца ў памеры Br14 трлн. "З улікам закладзенага ў асноўных напрамках грашова-крэдытнай палітыкі Беларусі на 2010 год росту патрабаванняў банкаў да эканомікі на 36-40 працэнтаў прыцягненне інвестыцый у асноўны капітал за кошт крэдытаў банка ў памеры Br14 трлн. рэальна", - адзначыў Андрэй Кабякоў. Прадугледжваецца, што сродкі насельніцтва як крыніца інвестыцый у асноўны капітал складуць Br4,6 трлн. з улікам таго, што ў бягучым годзе насельніцтва на гэтыя мэты накіравала Br3,7 трлн., а таксама з улікам запланаванага тэмпу росту рэальных грашовых даходаў насельніцтва ў 2010 годзе на ўзроўні 114 працэнтаў. Іншыя крыніцы прагназуюцца ў аб'ёме Br2,3 трлн. Гэта, галоўным чынам, лізінг. Гэта крыніца інвестыцый у асноўным капітал таксама не выклікае сумненняў. "А вось што сапраўды не пралічваецца - гэта замежныя крыніцы інвестыцый у асноўны капітал у аб'ёме каля Br7,7 трлн. Менавіта ў такім памеры ацэньваецца аб'ём рэсурсаў, якіх не хапае для забеспячэння выканання прагнознага паказчыка па інвестыцыях у асноўны капітал на ўзроўні 123-125 працэнтаў", - сказаў віцэ-прэм'ер. Андрэй Кабякоў паведаміў, што ўсе органы пацвярджаюць рэальнасць выканання ўстаноўленых паказчыкаў. У той жа час вынікі работы спецыяльна створаных міжведамасных рабочых груп паказалі, што існуе рэальны дэфіцыт крыніц выканання заданняў. "Рэальнае напаўненне інвестпраектамі і крыніцамі фінансавання пацвярджаюць толькі Мінбудархітэктуры, Мінлясгас, Мінгандаль, канцэрны "Беллегпрам", "Белдзяржхарчпрам", "Беллеспаперапрам" і "Белбіяфарм". У астатніх дзяржорганаў і выканкамаў выкананне заданняў у поўным аб'ёме не пацвярджаецца рэальнымі праектамі. Пацверджаны крыніцамі і праектамі аб'ём інвестыцый у асноўны капітал дае магчымасць забяспечыць тэмп іх росту толькі на 110 працэнтаў, фактычна толькі за кошт унутрыдзяржаўных крыніц", - адзначыў віцэ-прэм'ер. Для забеспячэння выканання ўстаноўленага кіраўніком дзяржавы паказчыка па інвестыцыях у асноўны капітал неабходна закрыць разрыў "у аб'ёме Br7,7 трлн., або $2,7 млрд. Гэта можна зрабіць толькі за кошт прыцягнення замежных інвестыцый", падкрэсліў Андрэй Кабякоў. Намеснік прэм'ер-міністра звярнуў увагу на неабходнасць у бліжэйшы час выкарыстоўваць рэзерв, які ўяўляюць сабой замежныя крэдытныя лініі. Пры гэтым размова ідзе не толькі аб традыцыйных нямецкай і італьянскай крэдытных лініях, аб'ём якіх цяпер складае 100 млн. і 67 млн. еўра адпаведна. "Рэальнай магчымасцю забяспечыць асваенне замежных інвестыцый у значных аб'ёмах з'яўляюцца звязаныя фінскія крэдытныя лініі пад будаўніцтва ЦЭЦ на мясцовых відах паліва. У 2010 годзе гэтыя аб'екты могуць быць размешчаны ў многіх райцэнтрах краіны. А гэта з улікам кошту будаўніцтва адной ЦЭЦ (Br95 млрд.) можа даць больш як Br10 трлн., або $3,5 млрд., інвестыцый у асноўны капітал", - сказаў Андрэй Кабякоў.

"БЕЛТА"