З дня адкрыцця беларускага дома-музея пісьменніка нічога не змянілася. Як не было вітрынаў і стэндаў, гэтак і няма. Экспанаты па-ранейшаму ляжаць на лавах і табурэтах
Гэты год юбілейны – Васілю Быкаву споўнілася б 85. Да канца года сястра пісьменніка Валянціна Ўладзіміраўна спадзявалася, што мясцовыя ўлады ўпарадкуюць нарэшце дом-музей Быкава ў вёсцы Бычкі Вушацкага раёна. У адбудаванай нанова хаце няма ніводнай вітрыны, экспанаты ляжаць на лавах і табурэтках. Нічога не змянілася і цяпер. Затое Валянціна Ўладзіміраўна з трапятаннем паказвае лісты з Украіны. Там у вёсцы Вялікая Севярынка ёсць школьны музей Быкава, вуліца яго імя. Рэч у тым, што ў Севярынцы Быкаў быў паранены на вайне – і сваякам нават прыйшоў пахавальны ліст, а на абеліску пасля вайны імя Быкава напісалі як загінулага. Аднак пісьменнік выкараскаўся тады. Ягоная сястра згадвае, як у часе вайны сям’я атрымала пахавальны ліст.Валянціна Быкава: Прачытала, што “ваш брат і сын лейтэнант Васіль Быкаў загінуў смерцю храбрых” і пахаваны ў вёсцы Вялікая Севярынка ва Ўкраіне, Кіраваградская вобласць.А літаральна перад пахаванкай сваякі атрымалі ліст ад самога Васіля. Спраўдзілі даты – і ўздыхнулі з палёгкай: ліст быў напісаны ўжо пасля весткі пра “смерць храбрых”.
Да юбілею пісьменніка ў Вялікай Севярынцы прайшлі святочныя мерапрыемствы.Валянціна Быкава: У школы ж грошай не было – збіралі ўсім светам, прадпрымальнікі ім дапамаглі. Трэба ж было абсталяваць пакой. Дык і настаўнікі рабілі, і вучні – пісалі пано, пра яго творчасць пісалі, пра аповесці.Са святкаванняў вучні даслалі Валянціне Ўладзіміраўне шмат здымкаў: імпрэза, музей, віктарыны па творчасці Быкава. Тым часам у Бычках з дня адкрыцця дома-музея пісьменніка нічога не змянілася. Як не было вітрынаў і стэндаў, гэтак і няма. Пра гэта хвалюецца Антаніна Быкава, загадчыца музея, жонка роднага брата Васіля Быкава.Антаніна Быкава: Нічога не змянілася – от хто кніжку дасць, хто карціну, хто з газеты якой выразку. Ні стэндаў няма, ні вітрынаў. Што на стале ляжыць, што я саставіла табурэткі ды рушніком накрыла… Як для хаты, дык асноўнае зрабілі. Але ж нарабілі разетак – казалі, стэнды будуць рабіць з падсветкай. Нічога пакуль няма…Між іншым, нават сама хата адбудаваная недакладна. Мы з Валянцінай Уладзіміраўнай уваходзім у сенцы – і яна пачынае пералічваць “несупадзенні”.Валянціна Быкава: Гэта сені былі, толькі падлога не такая была, а з зямлі. Столь ніжэйшая была, абы-якая, з дошак нейкіх. Тут во была на гарышча дзірка – і лесвіца стаяла. А тут яма была – свінням бульбу трымалі… Ложкі падобныя, але не тыя, што былі… Як рабілі, дык мох – і тое рэдка дзе клалі…2009 год – юбілейны, Васілю Быкаву споўнілася б 85 гадоў. Аднак у ягоным доме-музеі ў Бычках дагэтуль няма ані стэндаў, ані вітрынаў. У адрозненне ад украінскай вёскі Вялікая Севярынка, дзе да юбілею пісьменніка быў створаны музей з цудоўнай экспазіцыяй.
Стужка "Ганаровы грамадзянін Вушацкага раёна" і пасмяротны дыплом ад Чаргінца ляжаць на двух састаўленых табурэтках
Раман Тумашык, "Еўрапейскае радыё для Беларусі"