У Бібліятэцы Саюза беларускіх пісьменнікаў “Кнігарня Пісьменніка” выйшла кніга пад назвай “Пакахай мяне, калі ласка…”. Гэта зборнік сучаснай беларускай жаночай прозы, большасць аўтарак якога, як заяўлена ў анатацыі да кнігі, нядаўнія студэнткі і школьніцы, якія пакуль не маюць сваёй першай кнігі.
У кнізе чытач зможа пазнаёміцца з творамі Наталкі Бабінай, Вольгі Бабковай, Наталкі Харытанюк,Югасі Каляды, Аксаны Спрынчан, Ганны Кандрацюк, Дар’і Ліс, Міраславы Навіш ды іншых сучасных беларускіх пісьменніц. Большасць твораў зборніка цягам апошніх гадоў друкаваліся ў часопісе “Дзеяслоў”. У канцы кнігі змешчаны кароткія звесткі пра аўтарак.
Сама назва зборніка “Пакахай мяне, калі ласка…”шмат у чым гаворыць за сябе: гэтая кніга поўная шчырых, пранікнёных, эмацыйных споведаў, якія дапамогуць лепей зразумець загадкавую жаночую душу.
---------------------------------------------
Пакахай мяне, калі ласка... : зборнік сучаснай жаночай беларускай прозы. - Мінск: Кнігазбор, 2009. - 366 с. - (Бібліятэка Саюза беларускіх пісьменнікаў “Кнігарня пісьменніка”; вып. 3.)
