Зборнік вершаў Максіма Багдановіча ў перакладзе прэзентаваны ў Іспаніі, паведамілі БЕЛТА ў пасольстве Беларусі ў гэтай краіне.
Кніга класіка беларускай літаратуры "Згукі маёй Бацькаўшчыны" на іспанскай мове была выдадзена пры падтрымцы Міністэрства замежных спраў і пасольства Беларусі.
Прэзентацыя адбылася на літаратурна-паэтычнай вечарыне, прысвечанай творчасці беларускага паэта, у ганаровым консульстве Беларусі ў горадзе Алікантэ.
На творчай вечарыне, арганізаванай прадстаўнікамі беларускай дыяспары ў Іспаніі, прагучалі такія творы Максіма Багдановіча, як "Санет", "Я хацеў бы спаткацца з Вамі на вуліцы", "Слуцкія ткачыхі", "Зорка Венера" і іншыя. У мерапрыемстве ў тым ліку прынялі ўдзел беларусы, якія пражываюць у Іспаніі, дыпламаты і мясцовыя жыхары.
Прадстаўнікі беларускай дыяспары перадалі ў дар пасольству карціну вядомага гомельскага мастака Сяргея Радчанкі.
