У Вільні створаны Беларускі грамадскі камітэт памяці паўстанцаў 1863-1864 гг.

23 сакавіка 2019 г. у Нацыянальным музеі Літвы (Вільня) адбылася адкрытая публічная дыскусія па пытанні ўдзелу Беларусі і беларусаў ва ўрачыстасцях перапахавання парэшткаў паўстанцаў, знойдзеных на Замкавай гары ў Вільні ў выніку археалагічных раскопак 2016–2018  гадоў.


kalinouski-marka.jpg


У дыскусіі прынялі ўдзел літоўскія археолагі і гісторыкі Гіціс Грыжас, Валдас Сцепанайціс, Жыгінтас Бучыс і Альвідас Нікжэнтайціс, які з’яўляецца сябрам Дзяржаўнай камісіі Літвы, створанай у сувязі са згаданымі знаходкамі. З беларускага боку ў дыскусіі ўдзельнічалі гісторыкі Аляксандр Смалянчук, Язэп Янушкевіч, Васіль Герасімчык, Аляксандр Адамковіч і прадстаўнікі грамадскіх арганізацый.

Найбольшую увагу прысутных выклікала інфармацыя літоўскіх калегаў пра ідэнтыфікацыю парэшткаў кіраўніка паўстання Кастуся Каліноўскага (1838-1864). Альвідас Нікжэнтайціс паведаміў пра адсутнасць цікавасці беларускіх дыпламатычных службаў у Літве да дзейнасці згаданай Дзяржаўнай камісіі і пра зацікаўленасць літоўскіх сяброў Камісіі ў прысутнасці прадстаўнікоў беларускага народа, які актыўна ўдзельнічаў у змаганні “За нашу і вашу свабоду!”

Па выніках дыскусіі было прынятае рашэнне пра стварэнне Беларускага грамадскага камітэта памяці паўстанцаў 1863-1864 гг. з прадстаўнікоў беларускіх грамадскіх і культурніцкіх арганізацый, якія прадстаўляць грамадзянскую супольнасць краіны.

У склад працоўнай групы, якая будзе весьці перамовы з Дзяржаўнай камісіяй Літвы і іншымі установамі адказнымі за перапаханне і ўшанаванне памяці паўстанцаў 1863-1864 гг. увайшлі супрацоўнік Цэнтра беларускіх студыяў Варшаўскага ўніверсітэта, прафесар Інстытута славістыкі ПАН доктар гістарычных навук Аляксандр Смалянчук (старшыня), старшыня Таварыства беларускай культуры ў Літве доктар гуманітарных навук Аляксандр Адамковіч і кіраўнік ініцыятывы „Беларуская Нацыянальная Памяць” Анатоль Міхнавец.

У бліжэйшы час працоўная група Беларускага грамадскага камітэта памяці паўстанцаў 1863-1864 гг. правядзе сустрэчы з прадстаўнікамі літоўскага боку і адбудзецца прэс-канферэнцыя па пытаннях далейшай працы Грамадскага камітэту.

Запрашаем гісторыкаў, даследчыкаў, прадстаўнікоў творчых колаў і ўсіх, каго цікавіць праблематыка беларускай гістарычнай памяці, далучацца да працы Беларускага грамадскага камітэта памяці паўстанцаў 1863-1864 гг.

Кантакты:

Анатоль Міхнавец: anatol@michnaviec.org

Паводле прэс-рэлізу