На Купаллі ў Клайпедзе

23–24 чэрвеня сябры беларускага культурна-асветніцкага таварыства „Уздым“ на чале са старшынёй таварыства Жаннай Раманоўскай прынялі ўдзел у свяце „Купальскае гулянне“ ў Клайпедзе. У маляўнічым куточку, у сядзібе „Гервайчу“, на беразе ракі Мінія адбыўся яскравы канцэрт з удзелам вакальных калектываў: „Купалінка“, „Верасок“ (Клайпеда), „Світанак“ (Вісагінас), „Раніца“ (Шальчынінкай), „Спадкі“ (Тарту), „Сябры“ (Нарва), „Паўлінка“ (Ліепая), „Купалінка“ (Даўгаўпілс) і ансамбля з Беластоку. У выкананні даўгаўпілскай „Купалінкі“ разам з беларускімі народнымі песнямі прагучала латгальская народная песня „Auga, аuga rūžeņa“ („Ой, вырасла ружачка“) у маім перакладзе на беларускую мову. Я прачытаў свой верш „Купальская ночка“. Акрамя песень удзельнікі ансамбля „Купалінка“ прадставілі дзве народныя гульні, у якіх маглі паўдзельнічаць усе жадаючыя. У свяце сярод ганаровых гасцей былі амбасадар Беларусі ў Літве Валеры Бараноўскі і саветнік амбасадара Ірына Зубко. Гулянне прадоўжылася да позняй ночы з карагодамі каля вогнішча.

На наступны дзень цікавай была наша вандроўка на кацеры ўздоўж Куршскай касы і пешая прагулка па старым городзе.

Выказваем падзяку за запрашэнне і гасціннасць гаспадароў свята і асабіста кіраўніка ансамбля „Світанак“ саліста Сяргея Шабадалава і старшыню Аб’яднання беларускіх суполак Літвы Мікалая Логвіна.