Беларусы з Нью-Джэрсі і Філадэльфіі на Дзяды ўпарадкавалі магілы землякоў у Саўт-Рыверы.
Прадстаўнікі беларускай дыяспары Нью-Джэрсі і Філадэльфіі 3 лістапада сабраліся разам, каб навесці парадак і ўспомніць пра беларусаў, пахаваных на могілках у Саўт-Рыверы (South River, New Jersey), паведамляе ў сваім фэйсбуку Дзяніс Дземчанка.
У рысе горада Саўт-Рывер знаходзяцца асобныя беларускія могілкі, што былі заснаваныя ў ХІХ стагоддзі. Тут пахаваны знакамітыя пісьменнікі, палітыкі, навукоўцы, святары і іншыя.
Колькасць беларусаў у штаце Нью-Джэрсі, паводле неафіцыйных падлікаў, складае каля 5 тысяч чалавек.
Саўт-Рывер — адзін з цэнтраў беларускай эміграцыі. Ужо канцы ХІХ стагоддзя на гэтыя землі пачалі перасяляцца беларусы. А ў пачатку мінулага стагоддзя славянскія выхадцы з Беларусі складалі ў Саўт-Рыверы да траціны насельніцтва. Эмігранты з ваколіц Маладзечна і Вілейкі пабудавалі царкву Святых Пятра і Паўла, тады ў юрысдыкцыі РПЦ. Збеларусізаваўся Саўт-Рывер у пачатку 1950-х з перасяленнем у яго некалькіх дзясяткаў беларускіх эмігрантаў з лагероў для перамешчаных асоб у Германіі.
У Саўт-Рыверы беларусы заснавалі прыход Святой Ефрасінні Полацкай і пабудавалі царкву Св. Ефрасінні, тут дзейнічаюць адразу некалькі грамадскіх аб’яднанняў, а таксама выдаюцца газеты на беларускай мове «Беларус у Амерыцы» і «Беларуская думка».
