Беларусы Вроцлава стварылі для беларускіх дзяцей і іх бацькоў моўныя курсы

Два тыдні таму пры вроцлаўскай суполцы Беларускага Саюза Салідарнасці з’явіліся дзіцячыя моўныя курсы.


«Далучыць дзяцей да беларускай нацыянальнай культуры»

Курсы створаныя «з мэтай далучыць дзяцей да беларускай нацыянальнай культуры, паглыбіць знаёмства з родным краем, беларускімі традыцыямі і фальклорам» — распавялі арганізатары для Budzma.org.


01-dzwqb8h9xg4mkics91qt8z1rybttsr5j.jpg


Моўныя курсы толькі пачаліся, адбыліся першыя заняткі для чатырох узроставых катэгорый. Дзеці былі размеркаваныя па групах у адпаведнасці з узростам і з узроўнем падрыхтоўкі: першая група — гэта дзеці 6-7 гадоў, другая група — дзеці 8-9 гадоў, у 3 групе сабраліся 10-гадовыя, а ў 4 групе вучні 11-12 гадоў. Больш за ўсё жадаючых у першай узроставай катэгорыі.


Заняткі не падобныя да ўрокаў беларускіх школ

Выкладае на курсах прафесійны педагог беларускай мовы і літаратуры, якая вельмі любіць сваю працу і імкнецца перадаць дзецям любоў і павагу да мовы і культуры. Як адзначылі арганізатары, на занятках «выкарыстоўваюцца яе асабістыя дыдактычныя напрацоўкі, якія адаптуюцца да ўзроставых патрэбаў і ўзроўню ведаў у кожнай групе. Настаўніца ўключае сучасныя адукацыйныя тэхналогіі, элементы гульні, стварае ўмовы для творчасці. Мяркуючы па першых водгуках, дзеці і бацькі засталіся задаволеныя заняткамі».

У хуткім часе плануюць уключаць элементы гісторыі Беларусі, культуры і літаратуры, каб не абмяжоўвацца толькі моўнымі заняткамі.


02-pafwo33rcgn4ci39te8mh33ycioegpmt.jpg


«Наўрад ці гэта падобна на заняткі ў беларускіх школах — дзеці сядзяць разам за агульным сталом, яны камунікуюць і знаёмяцца паміж сабой. Мы спадзяёмся, што першыя два месяцы дазволяць найлепш адчуць патрэбы ў нашай мэтавай аўдыторыі — сем’і, якія жадаюць захаваць і развіваць беларускую мову, нават знаходзячыся ў эміграцыі. Таксама мы імкнемся дапамагчы настаўнікам, якія за мяжой хацелі б падтрымліваць сваю кваліфікацыю», — распавядае адзін з арганізатараў курсаў.


Для бацькоў-беларусаў — курсы польскай мовы

Знайсці жадаючых паўдзельнічаць для арганізатараў не стала праблемай, бацькі нават гатовыя аплочваць невялікую суму за заняткі. «Нам пашанцавала прайсці адбор у праграме дафінансавання малых ініцыятыў ад Нацыянальнага Інстытута Свабоды — Цэнтра Развіцця Грамадскай Супольнасці, таму першыя два месяцы навучанне беларускай мове для дзяцей будзе бясплатным. Адначасова іх бацькі могуць наведваць заняткі польскай мовы, што і прадугледжвалася праектам, таксама без аплаты на гэты перыяд», — дзеліцца добраю навіною прадстаўнік вроцлаўскай суполкі беларусаў.

Як зазначаюць арганізатары, задача польскіх моўных курсаў — даць бацькам базавыя практычныя веды. Вымушаны і часта раптоўны пераезд у іншую краіну не спрыяе хуткаму вывучэнню замежнай мовы. Нават калі беларусы даволі добра разумеюць польскую мову, стаіць камунікатыўны барʼер. Такія заняткі дапамагаюць знаходзіць патрэбныя размоўныя формулы ў бытавых сітуацыях.

«Праект мае доўгатэрміновую арыентацыю, таму мы будзем шукаць усе магчымасці, каб зрабіць яго карысным, удалым, насычаным і запатрабаваным», — рэзюмуюць арганізатары моўных курсаў.

Алесь Масевіч, budzma.org