У горадзе-пабраціме Мінска Эйндховене растуць дубы, пасаджаныя ў гонар зніклых беларусаў

16 верасня – 13 гадоў, як зніклі Віктар Ганчар і Анатоль Красоўскі. У гэты дзень у Эйндховене (Нідэрланды) адбудзецца цырымонія ўшанавання памяці гэтых беларусаў.

Чатыры гады таму тут пры ўдзеле муніцыпальных улад у цэнтры Эйндховена, які з 1995 года з’яўляецца горадам-пабрацімам Мінска, былі пасаджаны 4 дубы ў памяць пра зніклых Юрыю Захаранку, Віктару Ганчару, Анатолю Красоўскаму, Дзмітрыю Завадскаму.

У нядзелю на акцыі выступіць удава бізнесмена Ірына Красоўская, дэпутат парламента Нідэрландаў Ян-Марынус Вірсма і іншыя. Паэты Лео Месман і Піт ван дэн Боом зачытаюць свае вершы, прысвечаныя зніклым беларусам.

Падчас цырымоніі будзе таксама зачытаны верш Уладзіміра Някляева “Памяці зніклых”, напісаны спецыяльна да гэтай даты.

У датычнасці да знікнення Анатоля Красоўскага і Віктара Ганчара падазраецца шэраг былых і дзеючых высокапастаўленых чыноўнікаў.

Уладзімір Някляеў. Памяці зніклых

Няма вас сярод мёртвых і жывых.

Вы на зямлі не дажылі да смерці.

Пакінуўшы і родных, і чужых,

вы проста зніклі, як знікае вецер.

А мы жывём, бо трэба жыць далей,

каб зразумець, як дорага мы плацім

за ўсё –

і што за ўсё найдаражэй

магілы,

над якімі можна плакаць…