Трэцяга верасня ў Варшаве адбылося традыцыйнае ўшанаванне памяці Марыі Ямант — нарачонай Кастуся Каліноўскага.

У гэты дзень споўнілася 104 гады з моманту яе смерці. Студэнты навучальнай праграмы Каліноўскага сабраліся на Паванзкоўскіх могілках польскай сталіцы, дзе пахаваная Марыя. Арганізатарам мерапрыемства выступіла "Беларуская Нацыянальная Памяць".

Перад прысутнымі выступіў старшыня БНП Анатоль Міхнавец. Ён расказаў пра гісторыю знаходкі магілы і жыццёвы шлях самой Ямант. Пасля хвіліны маўчання ў памяць Ямант прысутныя паклалі на яе магілу кветкі і запалілі знічы.