Памёр дзеяч беларускай дыяспары ў Аўстраліі Міхась Лужынскі

У шпіталі ў Санкт-Пецярбургу памёр дзеяч беларускай дыяспары ў Аўстраліі Міхась Лужынскі. У Санкт-Пецярбургу ён знаходзіўся з турыстычнай групай. Верагодна, збіраўся наведаць Беларусь.

У шпіталі ў Санкт-Пецярбургу памёр дзеяч беларускай дыяспары ў Аўстраліі Міхась Лужынскі. У Санкт-Пецярбургу ён знаходзіўся з турыстычнай групай. Верагодна, збіраўся наведаць Беларусь. Пра гэта паведаміла сябра Вялікай Рады МГА “ЗБС “Бацькаўшчына”, старшыня Беларуска-Амерыканскага Задзіночання Ганна Сурмач.

Міхась Лужынскі (злева) на беларускіх могілках у Сіднеі, лістапад 2008 г.

Міхась Лужынскі нарадзіўся ў 1926 годзе ў вёсцы Кабылкі Палачанскай воласці Маладзечанскага павету Віленскага ваяводства (цяпер Маладзечанскі р-н Мінскай вобл.). Бацька працаваў сакратаром воласці. У 1935 годзе сям’я пераехала ў Гарадок, потым ў 1939 годзе ў Палачаны. У 1941 годзе Міхась Лужынскі скончыў сямігодку ў Хажове. А ў 1942 годзе пайшоў у гандлёвую школу ў Маладзечне, дырэктарам якой быў Барыс Кіт. Правучыўся там два гады. Быў сябрам СБМ.

Пасля закрыцця гандлёвай школы запісаўся добраахвотнікам у школу Люфтвафэ і разам з іншымі 46 хлопцамі быў вывезены ў Польшчу, а потым — у Нямеччыну. У 1945 годзе апынуўся ў беларускім лагеры Ватэнштат (Нямеччына), дзе ў 1946-м пазнаёміўся з будучай жонкай Надзеяй. Ажаніўся ў канцы 1948-га, а ў канцы 1949-га выехаў з жонкай ў Аўстралію.

Сям’я пасялілася ў Сіднеі. Спачатку Міхась працаваў электраманцёрам. Потым, скончыўшы інжынэрныя курсы, пайшоў па службовай лесвіцы ўгару, быў інспектарам пры пабудове электрычных лініяў. У 1979-м пачаў невялікі бізнэс — займаўся пакупкай і продажам драўніны.

Ад самага пачатку актыўна ўдзельнічаў у беларускім грамадскім жыцці Аўстраліі, быў сябрам Беларускага Аб’яднання ў Аўстраліі, узначальваў Беларускае Аб’еднанне ў Новай Паўднёвай Валіі (1951—1953 гг.), рэдагаваў часопіс «Новае жыцьцё», быў старшынёй Беларускага грамадска-культурнага клубу.

На працягу 17 гадоў яго голас гучаў на аўстралійскіх радыёхвалях аж да 2003 года, калі ўлады Аўстраліі закрылі беларускія радыёперадачы.

Успаміны Міхася Лужынскага чытайце тут.

Інфармацыйны цэнтр МГА “ЗБС “Бацькаўшчына”