Дзень Волі ў Канадзе + фота

26 сакавіка 2011 г. у Таронта адбылося святкаванне Дня Волі, арганізаванае Згуртаваннем беларусаў Канады.

Вольга Іпатава

На дзень Волі

Мы, Беларусы, слова “Свабода”

Лёсам пісалі, за іншых не горшым.

Альгердавай дзідай на Сініх Водах,

Харугвай у вераснёўскім небе пад Воршай.

Коней магутнымі капытамі

Пад Грунвальдам “ВОЛЯ!” прагрукаталі.

Жыло тое слова – пад свістам нагаек,

Пад ліўнем свінцовым, над рогатам зграі,

У Каліноўскага запавеце апошнім,

І слуцкіх паўстанцаў у сэрцы у кожным.

І сёння абараняць свабоду мы будзем

Ад подлай хлусні і няправедных суддзяў,

Ад турмаў, што трушчаць і думку, і лёсы.

Ад дыктатуры,

Што хоча закрыць нам нябёсы.

...Лунае ў сцягах сакавіцкая плошча,

І вецер стагоддзяў нам твары палошча.

А ў сэрцах – любоў да радзімы і волі.

Жыве Беларусь і не згіне ніколі!

26 красавіка 2011 г. Таронта

26 сакавіка 2011 г. у Таронта адбылося святкаванне Дня Волі, арганізаванае Згуртаваннем беларусаў Канады. Не толькі таронтаўскія беларусы, але і жыхары навакольных гарадоў сабраліся на плошчы Нэйтан Філіпс каля будынка Гарадской управы (City Hall), каб адзначыць угодкі ўтварэння БНР і падтрымаць змагароў з дыктатурай на Бацькаўшчыне.

Арганізатары мітынга падрыхтавалі вялікія стэнды з фотаздымкамі, якія адлюстроўваюць цяперашнюю сітуацыю ў Беларусі, з партрэтамі палітвязняў, што знаходзяцца пад арыштам пасля падзей 19 снежня, а таксама лозунгі супраць злачынстваў дыктатарскага рэжыму. Мноства бел-чырвона-белых сцягоў надалі плошчы ўрачысты і святочны выгляд.

Мітынг распачаўся гукамі дуды -- старадаўнія беларускія мелодыі прагучалі ў выкананні Хведара Апейкі.

Вядучы мітынга Зміцер Эльяшэвіч зачытаў вітальнае слова Старшыні Рады БНР Івонкі Сурвіллы.

Старшыня ЗБК Валянціна Шаўчэнка ўзгадала гісторыю станаўлення БНР і расказала аб тым, як на працягу гадоў святкаванне 25 сакавіка паступова стала днём пратэсту супраць рэпрэсіўнай улады, Днём Волі – днём вызвалення.

Яна адзначыла, што і сёння нашая краіна знаходзіцца ў палоне дыктатарскага рэжыму, які спыніў дэмакратычныя працэсы і трымаецца на жорсткім падаўленні свабоды, таму беларусы ўсяго свету мусяць праводзіць палітычныя акцыі ў падтрымку дэмакратыі ў Беларусі.

Вядомая беларуская пісьменніца Вольга Іпатава, якая гасцюе зараз у Канадзе, у сваем выступе падкрэсліла, што і пасёння беларуская мова пачувае сябе падчаркай у роднай хаце і што так званыя “чорныя спісы” аб забароне друкавацца і выступаць з канцэртамі творчым людзям Беларусі, якія выступілі супраць рэпрэсій, ужо дзейнічаюць. На заканчэнне свайго выступлення яна прачытала верш, напісаны спецыяльна да Дня Волі.

Верш аднаго з кандыдатаў у прэззідэнты, паэта Уладзіміра Някляева, які знаходзіццца цяпер пад хатнім арыштам і падвяргаецца псіхалагічнаму і фізічнаму ўціску, прачытала Алена Лявончанка.

З асуджэннем рэпрэсій і заклікам усебакова спрыяць дэмакратычным пераменам у Беларусі выступілі прафесар універсітэта Ватэрлоо Зінаіда Гімпелевіч і Алесь Кот.

Удзел у мітынгу ўзялі таксама міністар грамадзянства і эміграцыі Канады Джэйсан Кені і дырэктар па сувязях з грамадскасцю Канадскага камітэту за дэмакратычную Беларусь Майкл Лускінд. Яны падкрэслілі, што канадскі ўрад уважліва сочыць за падзеямі ў Беларусі і падтрымлівае імкненне да дэмакратычных пераменаў у гэтай краіне.

У рэзалюцыі мітынга прагучалі патрабаванні неадкладна вызваліць усіх палітвязняў, перапыніць усе крымінальныя справы супраць удзельнікаў мірнага шэсця 19 снежня, спыніць пераслед творчай інтэлігенцыі, нязгоднай з рэжымам, правесці справядлівыя і сумленныя выбары без удзелу Лукашэнкі, а таксама спыніць генацыд беларускай мовы і надаць ёй не папяровы, а рэальны статус дзяржаўнай.

На мітынгу ў Таронта праводзілася акцыя "Напішы ліст палітвязню", якую актыўна падтрымалі прысутныя. Людзі дасылалі беларускім змагарам з дыктытурай радкі з вершаў беларускіх паэтаў і свае словы падтрымкі.

Выступленне спеўнага гурту “Яваровы людзі” пад кіраўніцтвам Віялеты Кавалёвай і гімн “Магутны Божа”, які падхапілі ўсе прысутныя, сталі прыгожым і натхнёным завяршэннем Дня Волі ў Канадзе.