“Беларусь” яднае пакаленні

Сябры Нацыянальна-культурнай аўтаноміі "Беларусь" правялі 17 лістапада “Вечар трох пакаленняў”. Мерапрыемства адбылося ў Рэспубліканскім фіна-ўгорскім цэнтры горада Сыктыўкар (рэспубліка Комі).

Вечар быў арганізаваны з мэтай зблізіць беларусаў розных пакаленняў.

“На мерапрыемстве сабраліся прадстаўнікі трох пакаленняў, распавядае старшыня НКА “Беларусь” Аркадзь Крупенька. – Людзі майго пакалення гэта старэйшае пакаленне, нашыя дзеці – гэта сярэдняе пакаленне і нашыя ўнукі. У цёплай сяброўскай атмасферы мы ўзгадвалі, як праходзіла наша маладосць, гады вучобы. Людзі старэйшага пакалення распавядалі пра складанасці, з якімі яны сутыкаліся падчас вайны. Я, да прыкладу, тры гады не вучыўся, хтосьці працягваў вучыцца. Умовы тады былі жорсткія, галоўнае было выжыць. Распавядалі пра вучобу ў пасляваенны перыяд, многія школы згарэлі, падручнікаў фактычна не было, захаваліся падручнікі толькі ў старэйшых вучняў, адзін падручнік на дзесяць чалавек, і мы адзін да аднаго хадзілі. Потым была вучоба ў навучальных установах. Тады ў людзей было вялікае імкненне, каб атрымаць адукацыю”.

Прадстаўнікі старэйшага пакалення дапоўнілі свой расповед песнямі ваеннага і пасляваеннага перыяду. Сярэдняе пакаленне спявала ўжо камсамольскія песні.

“Тады ўжо ўмовы для жыцця лепшыя былі, гаворыць Аркадзь Сцяпанавіч. – З’явілася больш магчымасцяў: ездзілі ў студэнцкія атрады, у піянерскія летнікі. А нашыя ўнукі ўжо зусім па-іншаму жывуць. Яны больш дасведчаныя, могуць ездзіць свабодна за мяжу, у тым ліку і на вучобу, маюць доступ да тэлебачання, інтэрнету, сучасных тэхналогій”.

Па словах Аркадзя Сцяпанавіча, моладзь з вялікай цікавасцю слухала расповеды старэйшага пакалення. Са свайго боку маладыя людзі падрыхтавалі для вечарыны некалькі сучасных музычных нумароў. Вечарына ўсім спадабалася, таму сябры аўтаноміі “Беларусь” вырашылі не спыняцца на дасягнутым, а праводзіць падобныя сустрэчы розных пакаленняў у будучыні, а таксама ладзіць супольныя канцэрты, тэматычныя праграмы.

“Мы гэта дзеля нашай моладзі рабілі, дзеля іх далучэння да Беларушчыны. Падчас вечарыны мы таксама пра Беларусь гаварылі, адзначыў Аркадзь Сцяпанавіч.

У наступным годзе сябры нацыянальна-культурнай аўтаноміі “Беларусь” плануюць зладзіць вандроўку ў Беларусь.

“Трэба нашай моладзі паказаць Беларусь, гаворыць Аркадзь Крупенька. А то мы толькі распавядаем, а яны ж ужо тут нарадзіліся, і ў Беларусі ніколі не былі.”

З мэтай захавання беларускай прысутнасці ў Рэспубліцы Комі сябры нацыянальна-культурнай аўтаноміі “Беларусь” напярэдадні ўсерасійскага перапісу насельніцтва праводзілі тлумачальную працу ў Сыктыўкары і ў рэгіянальных аддзяленнях аўтаноміі з тым, каб як мага большая колькасць людзей падчас перапісу назвала сябе беларусамі. Цяпер  з нецярпеннем чакаюць вынікаў перапісу.

Сярод бліжэйшых планаў аўтаноміі – правядзенне навагодняй вечарыны 24 снежня. “Збяром каля 40 чалавек, самых актыўных. Болей, на жаль, запрасіць не зможам, бо магчымасці памяшкання не дазваляюць”, тлумачыць Аркадзь Сцяпанавіч.

Падчас вечарыны адбудзецца святочны канцэрт, пасля якога за навагоднім сталом сябры аўтаноміі ўзгадаюць зробленае за год, падвядуць вынікі працы ды абмяркуюць планы на будучы год.

Інфармацыйны цэнтр МГА “ЗБС “Бацькаўшчына”


Текст сообщения*
Загрузить файл или картинкуПеретащить с помощью Drag'n'drop
Перетащите файлы
Ничего не найдено
Отправить Отменить
Защита от автоматических сообщений
Загрузить изображение