Не здраджваць сваёй душы...

Згуртаванне беларусаў Канады адзначыла 100-я ўгодкі з дня народзінаў слаўнай беларускай паэткі, сакратара Рады БНР і пакутніцы сталінскіх ГУЛАГАЎ Ларысы Геніюш.

Згуртаванне беларусаў Канады адзначыла 100-я ўгодкі з дня народзінаў слаўнай беларускай паэткі, сакратара Рады БНР і пакутніцы сталінскіх ГУЛАГАЎ Ларысы Геніюш.

Праграма імпрэзы была разнастайнай: урыўкі з дакументальнага фільма пра Ларысу Геніюш, успаміны пра сустрэчы  і песні на яе словы, а таксама жывы голас паэткі, які гучаў у прыціхлай залі як запавет любіць Беларусь, служыць ёй да скону і не здраджваць сваёй душы.

Марыя Ганько, Вольга Іпатава, Віялета Кавалёва

Аўтаркай першай кнігі, дваццацічатырохгадовай паэткай  разам з Васілём Быкавым, Аляксеем Карпюком і Данутай Бічэль упершыню прыехала ў госці да Ларысы Антонаўны цяпер ужо  знаная пісьменніца Вольга Іпатава. Яна ж разам з Адамам Мальдзісам ад імя  Саюза пісьменнікаў  і прысутнічала на паховінах Геніюш у 1983 годзе. Ларыса Геніюш не раз цёпла ўзгадвала і Вольгу, і яе сына Руслана ў сваіх лістах.

Прысутныя з вялікай цікавасцю выслухалі яе ўспаміны, а таксама аповед Віялеты Кавалёвай пра яе адзіную, але на ўсё жыццё запамінальную сустрэчу ў Зэльве з жанчынай, чыё імя і пасля  смерці палохае ўлады.

В. Кавалёва таксама зачытала лісты Ларысы Геніюш да Раісы Жук-Грышкевіч.  Трэба адзначыць, што канадыйская эміграцыя яшчэ ў 1970-м годзе адзначыла 60-годдзе паэткі, і ўступнае слова да даклада зрабіў Вінцэнт Жук-Грышкевіч, які  вучыўся разам з Янкам Геніюшам ў Празе.

Урыўкі са “Споведзі”, якую некалі з перасцярогай вынес з хаты Геніюшаў археолаг і пісьменнік Міхась Чарняўскі, прачытаў Алесь Кот. Вершы Ларысы Антонаўны чытала Алена Лявончанка.

Алена Лявончанка

Алена Лявончанка

Алесь Кот

Алесь Кот

Асабліва кранальна гучалі песні і рамансы на словы паэткі, якія выконвалі Ала Асадчая  (разам з маленькай дачушкай), Аляксей Парэцкі, а таксама вядучая імпрэзы, старшыня Згуртавання беларусаў Канады Валянціна  Шаўчэнка.

Ала Асадчая

Ала Асадчая

Аляксей Парэцкі

Аляксей Парэцкі

Валянціна Шаўчэнка

Валянціна Шаўчэнка

У канцы імпрэзы адбылося чарговае – ужо другое – уручэнне прэміі імя выдатнага  грамадскага дзеяча Канады Міколы Ганька. На гэты раз  пасля Вольгі Іпатавай лаўрэаткай стала Віялета Кавалёва – за вялікую асветніцкую працу  і прапаганду духоўных дасягненьняў беларускай эміграцыі у Канадзе. Марыя Ганько, фундатарка прэміі, спадзяецца на шырокую актыўнасць беларускай грамады ў асвятленні  эміграцыйнай дзейнасці беларусаў Паўночнай Амерыкі, і асабліва Канады.

Ю. Трубец