Жыхары Цюмені вучылі беларускую "Лявоніху" і "Крыжачок"

Салісты і творчыя калектывы аддзела беларускай культуры і філіялаў Цюменскай абласной грамадскай арганізацыі “Нацыянальна-культурная аўтаномія “Беларусь” узялі ўдзел у абласным фестывалі “Мост Дружбы 2010”.

У гэтым годзе фестываль прысвечаны 65-гадовай гадавіне Вялікай Перамогі. Ад НКА “Беларусь” у фестывалі ўдзельнічалі 76 артыстаў, гэта прадстаўнікі сяла Вікулава і горада Цюмень. Лепшыя калектывы і выканаўцы -- прадстаўлялі сваё майстэрства ў нацыянальных песнях, танцах, спаборнічалі ў веданні легенд і паданняў свайго народа.

На “Цветном бульвары” ў Цюмені разгарнуліся каларытныя “падворкі”, дзе былі прадстаўлены не толькі элементы традыцыйнага побыту розных народнасцяў, але і нацыянальная кухня, прыкладное мастацтва, абрадавыя дзействы. У кожным кутку - свая музыка, свае нарады і нязменна добразычлівыя ўсмешкі людзей, гатовых расказаць пра свае традыцыі, накарміць і дазволіць прымераць тую ці іншую дэталь свайго нацыянальнага касцюма. Бульвар прыцягваў разнастайнай музыкай і пахамі мноства страў нават выпадковых мінакоў.

Госці фестывалю змаглі пабываць у беларускай хаце. На беларускім падворку гасцям былі рады і частавалі наведвальнікаў гарачымі дранікамі і калдунамі. Рэцэптамі прыгатавання страў дзялілася Галіна Палуян. Традыцыйная кухня - усяго толькі адзін з фрагментаў захавання традыцый народаў, якія пражываюць на тэрыторыі Цюменскай вобласці.

На беларускім падворку

Там і тут мільгалі святочныя касцюмы. Вялікае ўражанне на журы фестывалю і гледачоў зрабіла малітва на беларускай мове “Падай, Божа” ў выкананні начальніка аддзела беларускай культуры Уладзіслава Татарынцава і метадыста аддзела Алесі Азаранкі.

Уладзіслаў Татарынцаў і Алеся Азаранка

Запомніўся гледачам абрад "Вясковыя вячоркі” таварыства “Беларусь” у выкананні творчага калектыву “Вячоркі” (кіраўнік -- заслужаны работнік культуры РФ В. Міхіенка), запомніўся гледачам. Выпадковыя мінакі, якія зазіралі на падворак, станавіліся сапраўднымі ўдзельнікамі тэатральнага дзейства і з задавальненнем вучылі беларускую “Лявоніху” і “Крыжачка”.

Народны аснсамбль беларускай песні "Лянок" і народны фальклорна-этнаграфічны ансамбльь "Вячоркі"

Народны ансамбль беларускай песні “Лянок” (кіраўнік К. Зуева) прадставіў гледачам новую творчую праграму. Убачыць яе можна будзе і ў Мінску з 3 па 4 ліпеня ў рамках мерапрыемстваў, прымеркаваных да Дня Незалежнасці Рэспублікі Беларусь, куды калектыў запрошаны ДУ “Рэспубліканскі цэнтр нацыянальных культур”.