Абяцаныя чарка і шкварка, хоць і не дармовыя, але ж былі. Адмыслова для вечарыны ў меню дадаліся дранікі розных відаў (са смятанай, шкваркамі, салам ды кілбасой), а таксама журавінавы морс ды квас.
Вядучая Натальля Кузьміна, вядомая як «кавэзэшніца» з каманды «ЧП», сыпала «нацыяналістычнымі» лозунгамі: «Мы — беларусы! Мы — лепшыя! Нават у Маскве! Беларусы — яны і ў Маскве беларусы!»
Відаць, таму першы конкурс — па абіранні бульбы — мужчыны ўспрынялі як палітычны, і два з трох удзельнікаў разгарнулі на сцэне сцягі. Яўген — чырвона-зялёны, Алесь — бел-чырвона-белы. Па якасці абабранай бульбы, дарэчы, перамог апошні.
Зладзілі і конкурс для дзяўчат — вырабіць выцінанкі. І тут ужо кожная праявіла майстэрства, перанятае ці то ад бабулі, ці то ад настаўніцы пачатковых класаў падчас выразання сняжынак.
Але, бадай, галоўным чыннікам радасці былі запрошаныя гурты — «Хуткі смоўж» і «Osimira». Дзякуючы ім, маскоўскія беларусы паспелі і паскакаць досыць, і карагоды павадзіць, і «Надзеньку» хорам паспяваць.
Паводле сайту "Беларуская Масква"