Беларусы на парадзе Шумана ў Варшаве

9 траўня ў Варшаве адбыўся парад Шумана. Ён праводзіцца ў польскай сталіцы ўжо ў дзесяты раз і называецца так у гонар Плана Шумана — праекту 1950 года па аб’яднанні каменнавугальнай, жалезаруднай і металургічнай прамысловасці заходнееўрапейскіх краін, які пазней ператварыўся ў сімвал еўрапейскай эканамічнай, палітычнай і нават культурнай інтэграцыі. Да ўдзелу ў святкаванні запрашаліся ўсе, каму блізкая ідэя аб’яднання Еўропы. У ім удзельнічалі тысячы людзей, сярод іх — былы прэм'ер Польшчы Тадэвуш Мазавецкі, еўрадэпутат Януш Анышкевіч, прэзідэнт Варшавы Ганна Гранкевіч-Вальц, маршалак Сейму Браніслаў Камароўскі, а таксама група беларусаў.

— Мы прыйшлі сюды, бо мы неабыякавыя, хочам, каб Беларусь была часткай Еўропы, — сказала адна з удзельніц беларускай дэлегацыі з вялізнымі нацыянальнымі штандарамі. — Мяне выгналі з Беларусі, таму я жыву тут, але ніколі не зракуся гэтага сцягу.

— Я не патрэбны сваёй Радзіме, я мусіў уцячы, — патлумачыў іншы сцяганосец. — Цяпер я тут вучуся.

Арганізатары акцыі сцвярджаюць, што Шуманаўскі парад — адзінае такое шэсце, якое сапраўды не супраць, а за — пазітыўнае і аптымістычнае. Яно замыкае сабой цыкл навукова-папулярных і грамадска-культурных мерапрыемстваў, што адбываецца ў межах праграмы Польскіх Еўрапейскіх Сустрэч.

Адная з асноўных мэтаў грандыёзнага Шуманаўскага шэсця — заахвочванне насельніцтва да ўдзелу ў выбарах у Еўрапарламент, якія маюць адбыцца ўжо 7 чэрвеня, і якія цікавяць грамадства куды менш, чым выбары нацыянальныя. Адмыслова для гэтага 9 траўня ў цэнтры Варшавы былі адчыненыя спецыяльныя пункты прэ-галасавання, дзе ўдзельнікі шэсця маглі пакінуць папярэдні голас за пэўную партыю. Матываваць людзей да галасавання польская дзяржава вырашыла простымі і дзейнымі спосабамі — вялікімі кавалкамі крэмавага торта, падарункавымі торбамі і парасонамі.

— На самі выбары я, мабыць, і не пайду, — кажа пенсіянер у чарзе па прэ-бюлетэнь. — Там жа ніхто нічога не падорыць.Відаць, спадзевы на тое, што палякі па ўласным жаданні пацягнуцца выбіраць еўрапарламентараў, сапраўды нікчэмныя, бо на галоўную сцэну святкавання вывелі самую «цяжкую артылерыю». З заклікам да нацыі паўдзельнічаць у стварэнні агульнай еўрабудучыні выйшаў Тадэвуш Мазавецкі — першы дэмакратычны прэм’ер Польшчы, ікона «Салідарнасці», апазіцыйны актывіст савецкіх часоў. Ён быў названы ганаровым госцем параду. У якасці сувеніру яму дастаўся польскі сцяг, на якім распісваліся ўдзельнікі маршу.

 Паводле сайта "www.naviny.by"


Текст сообщения*
Загрузить файл или картинкуПеретащить с помощью Drag'n'drop
Перетащите файлы
Ничего не найдено
Отправить Отменить
Защита от автоматических сообщений
Загрузить изображение