З 4 па 6 ліпеня ў Вентспілсе ўжо ў чацвёрты раз праходзілі Дні беларускай культуры «Ад Ліга да Купалы», якія ладзіць вентспілскае беларускае таварыства «Спадчына» пры фінансавай падтрымцы Вентспілскай гарадской думы і фандатарскай дапамозе прадпрыемстваў “Вентспілскі гандлёвы порт”, Латвійскае параходства, “Вентспілс нафта” тэрміналс, “SZMA V”, “Вентамоньякс сэрвісс”, “Венцеб”, DCM Montaža, SIA “Tandem”, SIA “Eva”.
Упершыню ў Вентспілcе адсвяткавалі Купалле чатыры гады назад, калі ў горадзе на самым беразе Балтыйскага мора праходзілі Дні беларускай культуры. З таго часу Дні беларускай культуры ў прыморскім горадзе-курорце сталі традыцыйнымі і свята, якое ладзіць мясцвая беларуская суполка, стала агульнагарадскім. А ў мінулым годзе Дні беларускай культуры ў Вентспілсе выліліся ў міжнародны міні-фестываль беларускай музыкі і песні. Свята сабрала рэкордную колькасць гледачоў і ўдзельнікаў. 150 гасцей з Беларусі, Латвіі , Эстоніі прыехалі ў горад на ўзбярэжжа Балтыкі на цяпер ужо традыцыйныя Дні беларускай культуры “Ад Ліга да Купалы”.
Вось і сёлета тры дні Вентспілс жыў пад знакам беларускай культуры.
4 ліпеня ў 17.00 у Доме рамёслаў адчынілася выстава прац беларускіх майстроў. У экспазіцыі выставы – беларускія абрусы, рушнікі і паясы, вязаныя і вышываныя вырабы; кераміка, саломка, разьба па дрэву, упрыгожванні з бісера. Свае працы дэманстравалі Саюз майстроў народнай творчасці Беларусі, Полацкі цэнтр рамёслаў і Дом рамёслаў Шумілінскага раёна Віцебскай вобласці. Выстава экспанавалася ў Доме рамёслаў з 4 па 6 ліпеня.
Вентспілсчане ўжо знаёмы з багатым і самабытным музычным, выканаўчым, фальклорным мастацтвам суседзей-беларусаў. У гэтым годзе гасцямі фестывалю беларускай культуры сталі народныя калектывы «Вербіца» з Мінска, «Гульбічы» з Віцебскай вобласці, ужо знаёмая вентспілсчанам «Жытніца» з Магілёўскай вобласці, якія пазнаёмяць жыхароў і гасцей Вентспілса з тымі купальскімі традыцыямі і звычаямі Купалля, якія да сённяшніх дзён захаваліся на Беларусі.
Адбылася незвычайная сустрэча гледачоў з Заслужаным аматарскім калектывам Рэспублікі Беларусь – тэатрам танца “Прэм’ер-Спанайд” Палаца культуры Полацкага ААТ «Полацк-Шкловалакно.
Паводле “Латвійскага таварыства беларускай культуры “Сьвітанак”