Кнігі ў падарунак гімназістам

Новыя айчынныя выданні перададзены Вільнюскай беларускай гімназіі імя Францыска Скарыны.

Дэлегацыя з Беларусі, якую ўзначальваў намеснік Міністра інфармацыі Аляксандр Карлюкевіч, прымала ўдзел у 18-й Міжнароднай Вільнюскай кніжнай выставе-кірмашы. На нацыянальным стэндзе былі прадстаўлены лепшыя ўзоры кніжнай прадукцыі, выпушчаныя ў свет у 2016 годзе беларускімі дзяржаўнымі выдавецтвамі. Ладзілася таксама экспазіцыя кніг, прысвечаных 500-годдзю беларускага кнігадрукавання. Беларусь на выставе прадстаўлялі кнігагандлёвая арганізацыя “Белкніга” і музей “Замкавы комплекс “Мір”.

Беларуская дэлегацыя наведала й Вільнюскую беларускую гімназію імя Ф. Скарыны. У падарунак навучальнай установе перададзена шэсць вялікіх камплектаў кніг, у кожным з якіх — па 127 найноўшых беларускіх выданняў. А ў адказ гімназісты зладзілі для гасцей прыгожы канцэрт.

Нагадаем, Віленская беларуская гімназія была афіцыйна адкрыта ў студзені 1919 года. Яна стала адной з першых беларускіх сярэдніх школ у Літве. Сёння гэта адзіная беларускамоўная навучальная ўстанова ў суседняй краіне, якая дае поўную сярэднюю адукацыю.

Паводле “Голас Радзімы”