Пры Беларускай грамадзе ў Рэспубліцы Малдова ўвосень 2015 года быў арганізаваны  і  пачаў  дзейнічаць  беларускі  вакальны хор. Пра гэта паведаміў старшыня Рады Беларускай грамады ў Малдове Юры Статкевіч.

Як адзначае спадар Юры, хор з’явіўся “не раптам, не проста так”.

“На працягу  больш  за  10  гадоў на сваіх сходах, віншаваннях, пры  ўдзеле  ў  розных Рэспубліканскіх малдаўскіх мерапрыемствах мы, сябры  Беларускай   грамады  Малдовы,  заўсёды  спявалі  нашы  беларускія  песні: «Рушнікі», «Касіў Ясь канюшіну» , «Бярозы», «Бывайце здаровы», «Мой родны кут»  і  інш. Гэта падабалася ўсім слухачам і, у першую чаргу, самім выканаўцам. За гэты час утварылася група спевакоў і запявалаў з добрымі галасамі” – распавядае Юры Статкевіч.

Увосень 2015 года на Радзе Беларускай грамады ў Малдове было прынята рашэнне аб стварэнні беларускага вакальнага хору. Доўга шукалі мастацкага кіраўніка, спрабавалі некалькіх  і нарэшце знайшлі беларуса, прафесійнага музыку, які пагадзіўся  ўзяцца за гэту няпростую  справу. Гэта Дзмітрый Нікіцін - дырыжор джазавых эстрадных і духавых аркестраў.

“Пачаліся рэпетыцыі (па суботах)  і  выступы, - распавядае Юры Статкевіч. - Спачатку ў сваім калектыве, як было раней, потым у Клубе рускай песні,  потым на Рэспубліканскіх мерапрыемствах: «Дзень роднай мовы» і «Масленіца».  Пакуль  робім  першыя  крокі”.

Праблема, на якую скардзіцца Юры Статкевіч, - гэта адсутнасць беларускіх нацыянальных строяў для выступленняў удзельнікаў хору. Разм з тым спадар Юры спадзяецца, што гэтую праблему ўдасца вырашыць.

“Спадзяемся, што  дзяржаўныя  улады  нашай  Радзімы  падтрымаюць  гэту  ініцыятыву  і акажуць дапамогу ў атрыманні беларускіх  нацыянальных  строяў  для вакальнага хору Беларускай абшчыны Малдовы  на  карысць  нашай   Бацькаўшчыны, - адзначае Юры Статкевіч. -  Спяваем  ад шчырага сэрца нашы беларускія песні. Стараемся, каб  людзі ў  Малдове ведалі і паважалі нашу  Беларусь!”