Сын Станіслава Шушкевіча асуджаны на 10 сутак за рэпосты ў фэйсбуку

4 лістапада ля пад’езда ўласнага дома быў затрыманы 36-гадовы прадпрымальнік Станіслаў Шушкевіч, сын першага кіраўніка Беларусі. Гэтую інфармацыю «НН» пацвердзіла мама Станіслава, спадарыня Ірына.<

Справа ў тым, што заяву на Шушкевіча-малодшага напісаў участковы, ягоную ўвагу прыцягнулі рэпосты, якія рабіў Станіслаў на старонцы ў фэйсбуку. У выніку мужчыну асудзілі на 10 сутак, цяпер ён адбывае пакаранне ў ЦІП на Акрэсціна.

«Я не ведаю, што там былі дакладна за рэпосты, але ён супраць гэтага рэжыму і не хавае гэтага», — кажа маці.

Папыталіся мы ў спадарыні Ірыны, як цяпер пачуваецца Шушкевіч-старэйшы. «Баляць ногі, праз гэта перажывае, што не можа ў шэсцях удзельнічаць, але ўсё адно хоча туды».

ЗП, nashaniva.by