Ён такі разумны, а яна вясёлая. Суперкніга пра Біла з Болаю

Саюз беларускіх пісьменнікаў выпусціў унікальную дзіцячую кнігу “Суперкніга пра Біла з Болаю” пра маленькую дзяўчынку з абмежаванымі магчымасцямі. Гэта першая кніга па-беларуску, дзе пранікнёна і рэалістычна распавядаецца пра сям’ю, у якой расце незвычайнае дзіця.

У хлопчыка Біла з’яўляецца маленькая сястрычка Бола – нагода для радасці, весялосці і гонару. Але час ідзе, і паступова сям’я пачынае разумець, што з Болай адбываецца нешта не тое, яна зусім не размаўляе. Кніга ў вершаванай форме распавядае пра жыццё маленькай дзяўчынкі, якая  ніколі не будзе як усе.  Пра звязаныя  з гэтым радасць і гора, надзею і роспач. Пра тое, наколькі мы гатовыя жыць побач з тымі, хто не падобны да нас. Але найперш гэтая кніга пра любоў і здольнасць прымаць.

bola1.jpg

“Суперкнігу пра Біла з Болаю” пераклалі на беларускую мову Надзея Кандрусевіч і Алеся Башарымава, а таленавіты  беларускі паэт Андрэй Хадановіч зрабіў так, каб пераклад загучаў напоўніцу – эмацыйна і  кранальна. Аповед вядзецца ад імя Біла, брата Болы, з якім чытач разам перажывае ўсю гаму пачуццяў – і шчасце, і боль, і злосць, і замілаванне. І роздум:

“Каб не мелі мы побач нікога,
Каму трэба ад нас дапамога,
Каб ніхто хоць бы раз не прасіў аб маленечкім цудзе, --
Дык навошта існуе наш РОЗУМ
І ўвогуле – ЛЮДЗІ?!”

bola2.jpg

Аўтарка кнігі – шведская  пісьменніца Гуніла Бэргстрэм. З 1971 года яна напісала каля 40 дзіцячых кніг, якія сама і праілюстравала. Яна пісала гісторыю Біла і Болы са сваёй уласнай сям’і: у яе двое дзяцей, а ў малодшай дачкі аўтызм.

Кнігі пра Біла і Болу – класіка шведскай літаратуры, яны шырока чытаюцца ў каледжах і навучальных установах. Паводле іх знятыя анімацыйныя фільмы і зробленыя тэатральныя пастаноўкі.  А ў 2012 годзе на кніжным кірмашы ў Гётэборгу Гуніле Бэргстрэм уручылі залаты медаль “за новы падыход у напісанні і афармленні дзіцячай кнігі з бездакорным адчуваннем дзіцячага светапогляду”.


“Суперкнігу пра Біла з Болаю” ўжо ў продажы, яе можна набыць па наступных адрасах:

Мінск:

"Галіяфы" (halijafy.by),

"Рыжы кот" (ГЦ Рыга),

"Замечательные книги"( ГЦ Няміга-3) ,

у ІП Афанасенка (Маскоўска-Венскі)

"Цэнтральная кнігарня" (пр-т Незалежнасці, 19),

"Акадэмкніга" (пр-т Незалежнасці, 72),

"Кнігі і кніжачкі" (пр-т Незалежнасці, 14),

"Кнігарня пісьменніка" (вул. Казлова, 2),

"Светач" (пр-т Пераможцаў, 11),

"Веды" (вул. К. Маркса, 36),

Этнакрама "Рагна" (вул. Сухая, 4),

ІП А. Яўдаха (Knihar Knihiby),

Алесь Дудар (Арэна-сіці),

"Выдатныя кнігі" (Няміга,3 бокс 21),

"Сундучок" http://sunduchok-knig.by/

Брэст:

"Вітаўт" (вул. Савецкая, 55),

і з дастаўкай па ўсім свеце на https://symbal.by/t/688-khiha-bil-bola/

Прэс-служба ГА “Саюз беларускіх пісьменнікаў”