«У нас адзін галоўны конь — Пагоня». У Горадні адкрылася выстава калядных конікаў

Выставу «Калядныя конікі» адкрылі 27 сьнежня ў Цэнтры гарадзкога жыцьця ў Горадні. На ёй можна ўбачыць 43 варыяцыі на тэму нацыянальнага герба Беларусі.


01-050ed1bf-7217-40cb-90c9-e967be1084ab_cx0_cy10_cw0_w1597_n_r1_st.jpg

Карціна з выставы «Калядныя конікі»


Аўтарка выставы — горадзенская мастачка Валянціна Шоба. Яна прызнаецца, што падрыхтавала яе за 20 дзён.


02-33d802f3-bea9-49e1-a0f7-d5641aaf36c2_w1597_n_r0_st.png

Валянціна Шоба


«Усё гэта з такім добрым пачуцьцём, каб хоць 5 хвілін сьвята было. Мы нашу Пагоню перамалявалі ў розных прыкладах», — кажа Валянціна Шоба.

Арганізавалі выставу Ірына Варкулевіч і Аляксандар Балдакоў. Ірына больш расказала пра тэму калядных конікаў.

«У нас цяпер адзін галоўны конь — гэта Пагоня. Аўтаматычна ён пераходзіць у калядных конікаў, пернічных. Сьнег, коні, вельмі ўсё прыгожа, калядная казка... Гэта вельмі прыгожае сьвята, сьвята жаданьняў, коні таксама чароўныя. Я спадзяюся, што ва ўсіх нас усе жаданьні споўняцца», — расказала Ірына Варкулевіч.


06-d1a71b35-9ee2-46dc-b7fa-cf47b1aea227_w1597_n_r0_st.png

Ірына Варкулевіч


Адначасна ў культурнай прасторы зьявілася інсталяцыя з казкі «Шчаўкунок». Яе падрыхтавалі, каб павіншаваць дзетак перад Новым годам.

«Гэта калядная казка. Яна вельмі актуальная. Дзяўчынка абараняе Шчаўкунка. Яна вымусіла сваім абцасікам сямігаловага Пацучынага караля зьнікнуць», — тлумачыць Ірына Варкулевіч.


07-e925649d-c026-470e-8635-fd1777de754c_w1597_n_r0_st.jpg

Інсталяцыя да казкі пра Шчаўкунка


Выстава «Калядныя конікі» плянуе працаваць да 14 студзеня.

svaboda.org