У лонг-ліст «Оскара» афіцыйна ўключылі беларускі фільм «Крышталь»

Стужка Дар’і Жук пра спробу зьехаць зь Беларусі 1990-х — адна з 87, якія прэтэндуюць на «Найлепшы фільм на замежнай мове» паводле Амэрыканскай кінаакадэміі.

Краіны-суседзі Беларусі таксама выставілі свае фільмы на «Оскара»: Літва — дакумэнтальны «Цудоўныя няўдачнікі: Іншая плянэта» (Nuostabieji Lūzeriai. Kita planeta), Латвія — дакумэнтальны «Працяг будзе» (Turpinājums), Польшча — рамантычную драму «Халодная вайна» (Zimna wojna), Расея — ваенную драму «Сабібор» (Собибор), Украіна — ваенную трагікамэдыю на падставе дакумэнтальных матэрыялаў «Данбас» (Донбас).

«Оскараў» — прызы Амэрыканскай кінаакадэміі — у 91-ы раздадуць 24 лютага наступнага году. Шорт-ліст — галоўных прэтэндэнтаў на прэмію — маюць назваць 22 студзеня.


01-296D9B43-C08A-48B1-AC0E-8F50F99CD4A4_w1597_n_r1_s.jpg

Прэм’ера фільму «Крышталь» у Менску, 29 жніўня 2018 году


Беларускі «оскарскі» камітэт быў створаны ў 2018 годзе. «Крышталь» стаў першым за два дзясяткі гадоў беларускім фільмам, які вырашылі намінаваць на амэрыканскую кінапрэмію.

На намінацыю ад Беларусі прэтэндаваў таксама фільм «Сабака руды» пра сабак-«камікадзэ» ў Другую сусьветную вайну ад стваральнікаў кіно «Мы, браты».

Здымкі фільму «Крышталь» беларускай рэжысэркі Дар’і Жук адбываліся ў Беларусі, у вытворчасьці фільму ўдзельнічалі кінакампаніі зь Беларусі, ЗША, Нямеччыны і Расеі. Летась стужка атрымала узнагароду ў сэкцыі Works in Progress на Талінскім міжнародным кінафэстывалі.

Галоўная гераіня фільму «Кршталь» Эвэліна (Вэля) жыве ў Менску, але марыць зьехаць у ЗША, каб працаваць дыджэем. Каб атрымаць візу, ёй даводзіцца паехаць у невялікае мястэчка і прасіць дапамогі ў сям’і Сьцяпана, які нядаўна вярнуўся з войска і ў якога празь некалькі дзён мае адбыцца вясельле. У ланцужку падзеяў сьмешнае зьвязана з сумным і часам брутальным.

Фільм «Крышталь» атрымаў гран-пры кінафэстывалю ў Алматы​, гран-пры Адэскага міжнароднага кінафестывалю, а таксама галоўны прыз конкурсу «Капрадукцыя. Акно ў сьвет» расейскага кінафэстывалю «Акно ў Эўропу», які праходзіў у Выбаргу.

Рэжысэрка Дар’я Жук нарадзілася ў Менску, вучылася і жыве ў ЗША. Скончыла Гарвардзкі і Калюмбійскі ўнівэрсытэты, працавала на канале HBO, зьняла некалькі кароткамэтражных фільмаў. Адзін зь іх, «Сапраўдная амэрыканка», быў адзначаны дыплёмам Менскага міжнароднага кінафэстывалю «Лістапад» у 2015 годзе.

Сярод кароткамэтражных фільмаў Дар’і Жук — «Тое, што цябе не заб’е», «Зьесьці турыста», «Паветра ўнутры», тэлевізійны пілёт сыткому «Філфак».

***

Летась «Оскара» за найлепшы замежны фільм далі чылійскай «Фантастычнай жанчыне» (Una mujer fantástica), два гады таму — іранскаму «Прадаўцу» (فروشنده), тры гады таму — вугорскаму «Сыну Саула» (Saul fia). Чатыры гады таму статуэтку атрымаў фільм суседзяў Беларусі — польская драма «Іда» (Ida).

“Радыё Свабода”



Текст сообщения*
Загрузить файл или картинкуПеретащить с помощью Drag'n'drop
Перетащите файлы
Ничего не найдено
Отправить Отменить
Защита от автоматических сообщений
Загрузить изображение