Сустрэча кіраўнікоў МЗС Усходняга партнёрства і Вышаградскай групы праходзіць без удзелу Беларусі

Прадстаўнікі Беларусі не ўдзельнічаюць у сустрэчы міністраў замежных спраў краін Усходняга партнёрства і Вышаградскай групы 5 сакавіка ў Празе. Пра гэта БелаПАН паведаміў прэс-сакратар Міністэрства замежных спраў Чэхіі Віт Каларж.

"Беларускія ўлады былі запрошаныя на ўзроўні намесніка міністра замежных спраў. Верагодна, месца для беларускай дэлегацыі пакінуць пустым, і крэсла, на жаль, будзе свабодным", — дадаў Каларж. У сваю чаргу прэс-сакратар беларускага МЗС Андрэй Савіных заявіў: "Мы вырашылі не ўдзельнічаць у гэтым мерапрыемстве. Удавацца ў дэталі не маю намеру". Тым часам, як паведамляе МЗС Чэхіі, на сустрэчы чакаецца прысутнасць вярхоўнага прадстаўніка ЕС па замежных справах і палітыцы бяспекі Кэтрын Эштан і еўракамісара па пытаннях пашырэння і палітыкі добрасуседства Штэфана Фюле. Адмова Беларусі ад удзелу ў пражскай сустрэчы праходзіць на фоне дыпламатычнага канфлікту паміж Мінскам і Бруселем. 27 лютага Савет міністраў замежных спраў краін ЕС прыняў рашэнне пашырыць спіс неўязных у краіны Еўрасаюза прадстаўнікоў беларускай дзяржавы, уключыўшы ў яго яшчэ 21 прозвішча. 28 лютага беларускія ўлады рэкамендавалі кіраўніку прадстаўніцтва Еўрасаюза Майры Моры і паслу Польшчы Лешаку Шарэпку "выехаць у свае сталіцы для кансультацый, каб давесці свайму кіраўніцтву цвёрдую пазіцыю беларускага боку аб непрымальнасці націску і санкцый". У адказ на гэта ўсё краіны ЕС адклікалі сваіх паслоў з Мінска. Усходняе партнёрства — ініцыятыва ЕС, якая ахоплівае шэсць краін Усходняй Еўропы і Паўднёвага Каўказа: Арменію, Азербайджан, Беларусь, Грузію, Малдову і Украіну. УП было заснавана 27 краінамі ЕС і шасцю партнёрскімі краінамі на саміце ў Празе 7 мая 2009 года. Ініцыятыва скіравана на ўмацаванне адносін паміж ЕС і яго ўсходнімі суседзямі за кошт паглыблення палітычнага супрацоўніцтва і эканамічнай інтэграцыі. Вышаградская група, таксама вядомая як "Вышаградская чацвёрка", — саюз Венгрыі, Польшчы, Славакіі і Чэхіі. Паказвае імкненне гэтых цэнтральна-еўрапейскіх дзяржаў супрацоўнічаць па шэрагу кірункаў, якія ўяўляюць узаемную цікавасць, у межах еўрапейскай інтэграцыі. ВГ утворана 15 лютага 1991 года на сустрэчы прэзідэнтаў Венгрыі, Польшчы і Чэхаславакіі ў Вышаградзе (Венгрыя).

Антон Тарас, БелаПАН