Беларусь застанецца без сталага прадстаўніка МВФ

Сталая прадстаўніца Міжнароднага валютнага фонду ў Беларусі Натальля Калядзіна пакіне сваю пасаду ў красавіку.

«Калядзіна, якая ад красавіка 2009 году зьяўляецца сталай прадстаўніцай МВФ у Беларусі, вернецца ў штаб-кватэру МВФ пасьля заканчэньня трохгадовага тэрміну», — гаворыцца ў прэсавым рэлізе МВФ. МВФ не плянуе прызначаць новага сталага прадстаўніка, гаворыцца ў паведамленьні. «Калі беларускім бокам будзе плянавацца новая праграма, фонд разгледзіць магчымасьць прызначэньня новага сталага прадстаўніка ў Беларусі», — цытуе Інтэрфакс паведамленьне. Фактычна гаворка ідзе пра паніжэньне ўзроўню прадстаўніцтва МВФ у Беларусі, кажа былы старшыня Нацыянальнага банку Станіслаў Багданкевіч. «Гэта сьведчыць пра тое, што ў краіны па-ранейшаму дрэнны імідж (...) Мы не праводзім рэформаў. Заходняму сьвету, МВФ надакучыла мець з намі шчыльныя стасункі», — заявіў Багданкевіч у інтэрвію БелаПАН. Чарговая аглядная місія Міжнароднага валютнага фонду будзе знаходзіцца ў Менску з 22 лютага па 6 сакавіка. Місія правядзе традыцыйны штогадовы агляд сытуацыі ў эканоміцы Беларусі, як ва ўсіх краінах-сябрах арганізацыі. Акрамя таго, місія правядзе другі постпраграмны маніторынг у Беларусі, вывучыць, як выконваюцца ўмовы папярэдняга крэдыту МВФ. Узначаліць місію Крыс Джарвіс. Са студзеня 2009 году па красавік 2010 году беларускія ўлады рэалізавалі праграму МВФ stand-by, якая была падтрымана крэдытам на $3,6 мільярда. 31 траўня 2011 году ўрад і Нацбанк Беларусі зьвярнуліся ў МВФ з просьбай аб выдзяленьні новага фінансаваньня на суму да $7 млрд. Кіраўніца Нацбанку Беларусі Надзея Ермакова ў канцы студзеня заявіла, што Беларусь хоча атрымаць новы крэдыт МВФ для рэфінансаваньня ранейшых пазыкаў, вяртаньне якіх пачынаецца ў 2012 годзе і дасягне піку ў 2013–2014 гадах.

Радыё Свабода