Зачынілі галерэю ў «Фальварку Добрыя Мысьлі»

7 чэрвеня куратары культурных праектаў у «Фальварку Добрыя Мыслі» Тацяна Гаранская і Віктар Маркавец забралі мастацкія творы, кнігі, аргтэхнічныя прылады і развіталіся з месцам сваёй дзесяцігадовай працы. Ад гэтага дня ў сталіцы краіны паменела яшчэ на адну незалежную творчую пляцоўку.

Падзеі апошніх дзён вакол «Фальварка Добрыя Мыслі», што на вуліцы Магілёўскай, 12, прадказвалі такі фінал. 31 траўня з прычыны забароны там не ўдалося зладзіць прэзентацыю новай кнігі Уладзіміра Мацкевіча «Не думайце пра рыжага і сляпога качканоса». А 1 чэрвеня забаранілі адкрыццё пасмяротнай выставы Міхася Рагалевіча.

Расказвае куратарка выставаў у «Добрых Мыслях» Тацяна Гаранская:

«Мне растлумачылі ўласнікі «Фальварка», што за паўгадзіны да адкрыцця выставы ім быў званок з гарвыканкама ад загадчыка аддзела ідэалогіі. Падрабязнасцяў мне не тлумачылі, сказалі: «Без каментароў!»

Экспазіцыю выставы арганізатары са сценаў, аднак, не здымалі, спадзеючыся, што гаспадары «Фальварка» справу неяк залагодзяць. 6 чэрвеня іхныя надзеі былі канчаткова абарваныя.

«Я пазваніла ўчора, і мне сказалі канчаткова, што галерэі не будзе».

Сёння куратары дэмантавалі так і не адкрытую выставу Міхася Рагалевіча, забралі са сховаў творы іншых мастакоў, кнігі і ўсе астатнія рэчы, якія сабраліся ў галерэі за дзесяць гадоў яе працы. Куратарка галерэі Тацяна Гаранская падсумоўвае зробленае:

«Мы зрабілі больш за трыста выставаў. Творы прывозілі ад мастака і адвозілі, рабілі каталогі, і ўсё гэта было дабрачынна. І гэта была на працягу дзесяці гадоў адзіная беларускамоўная прыватная галерэя. Паднялі ўнікальную праграму — мастацтва Заходняй Беларусі. І не толькі ў межах гэтай галерэі, а па ўсёй Беларусі правезлі гэтыя выставы і дабіліся таго, што экспанавалі невядомых мастакоў, карціны якіх потым набывалі Нацыянальны мастацкі і іншыя музеі. І яшчэ адна вельмі важная праграма была — мастацтва маляванага дывана. Гэта этна-арт на новым узроўні, і такі новы напрамак акрэсліўся, які называецца этна-мадэрн».

Апрача выставаў у галерэі праводзіліся прэзентацыі новых кніг, адбываліся творчыя сустрэчы, літаратурныя фэсты.

"Радыё Свабода"