Будзем любіць і без узнагароды

Малады Фронт у другі раз уручыў прэмію за любоў да Беларусі. Але пераможцы ў намінацыях засталіся без сімвалічных статуэтак, бо іх сканфіскавалі супрацоўнікі КДБ.

За некалькі гадзін да ўручэння прэміі «Люблю Беларусь» стала вядома, што супрацоўнікі КДБ сканфіскавалі ў навучэнца мастацкай вучэльні «Глебаўкі» 8 статуэтак-узнагарод, якія прызначаліся для пераможцаў прэміі. 4 супрацоўнікі КДБ проста прыйшлі да маладога чалавека ў кватэру і без складання пратаколу забралі статуэткі.

Напачатку імпрэзы, якая адбылася на Сядзібе БНФ, арганізатары прэміі паабяцалі, што статуэткі ўзновяць. Адсутнічалі, аднак, не толькі статуэткі, але і большасць пераможцаў. Частка іх сядзіць у турме, другая — неўязныя. Дый арганізатары ўручэння прэміі не ўсе засталіся на свабодзе. Такая гэта было сёлета прэмія, са слязамі на вачах.

У васьмі намінацыях на прэмію было вылучана 39 кандыдатаў — ад асобаў да фестываляў.

Намінантамі і пераможцамі прэміі «Люблю Беларусь» у 2011 годзе сталі:

«Беларусізацыя»

У гэтым годзе ў галіне папулярызацыі беларускай мовы і культуры намінаваліся:

стваральнік беларуска-расійскага кампутарнага перакладчыка «Белазар» Алег Азароўскі,

Беларуская Вікіпэдыя,

старшыня Гродзенскага аблвыканкама Сямён Шапіра за ўкараненне беларускай мовы ў справаводства дзяржаўнай установы,

першы фестываль беларускай рэкламы «Аднак»;

галоўны рэдактар газеты «Звязда» Уладзімір Наркевіч.

Пераможцам быў абвешчаны праект Беларуская Вікіпедыя.

«Pro-Belarus»

З замежнікаў, што спрычыніліся да папулярызацыі Беларусі ў свеце, у гэтым годзе намінантамі сталі:

Марыя Содэрберг — кіраўнічка беларускай суполкі ў Швецыі за кароткаметражную стужку «49»,

музычны фестываль «Білоруська весна» які праходзіў ва Ўкраіне,

Аляксей Арцёмаў — грамадзянін Расіі, які піша вершы на беларускай мове,

Том Стопард — брытанскі драматург,

арганізатары фестывалю «Be2gether».

Пераможцам была названа Марыя Содэрберг. Арганізатары пажартавалі, што ў цяперашніх умовах яе зяўленне ў Беларусі малаімавернае.

«Журналістыка»

За прафесійныя дасягненні ў беларускай журналістыцы намінаваліся:

Зміцер Лукашук — журналіст Еўрапейскага радыё для Беларусі,;

супольнасць незалежных журналістаў,

Таццяна Елавая — блогерка, што актыўна распаўсюджвала інфармацыю ў блогах і сацыяльных сетках аб падзеях 19 снежня,

Сяргей Дарафееў — вядоўца ток-шоў «Выбар» на канале АНТ,

Віктар Малішэўскі — журналіст і аналітык;

Тут пераможцамі стаў Зміцер Лукашук за вострыя пытанні Аляксандру Лукашэнка аб лёсе кандыдата ў прэзідэнты Уладзіміра Някляева.

«Культура»

Намінантамі ў галіне культуры былі:

Валер Булгакаў — выдавец часопіса «Arche»,

Рэдакцыя тэлеканала «Белсат»,

«У нескладовае» — музычны праект,

Лявон Вольскі — лідар гурту «NRM»,

беларускія ўдзельнікі акцыі «З табурэтам да акіяна».

Пераможцам быў абвешчаны Лявон Вольскі.

«Палітыка»

За дасягненні ў беларускай палітычнай сферы намінантамі 2011 года сталі:

Уладзімір Някляеў — кандыдат у прэзідэнты на выбарах-2010,

Яўген Ліпковіч — вядомы блогер,

Наста Палажанка — лідарка моладзевага руху ў Беларусі,

Мікалай Статкевіч — кандыдат у прэзідэнты на выбарах-2010,

Алесь Міхалевіч — кандыдат у прэзідэнты на выбарах-2010.

З пяці герояў гэтай намінацыі ў дадзены момант у турме ці пад хатнім арыштам знаходзяцца чатыры. Пераможцам у ёй абвесцілі Уладзіміра Някляева. Прысутны на імпрэзе Яўген Ліпковіч зрабіў кароткую прамову з пажаданнямі хутчэйшага вяртання палітвязняў на волю, а таксама публічна прадставіў свой падарунак для Насты Палажанкі. Блогер падарыў ёй сваю дызайнерскую саколку «ШОС» і паспадзяваўся, што ўжо на 8 Сакавіка Палажанка яе дакладна атрымае.

«Спорт»

Намінанты сярод беларускіх спартоўцаў за ўнёсак у грамадскую чыннасць і культуру:

Антон Пуціла — паўабаронца зборнай Беларусі па футболе,

Максім Мірны — тэнісіст і бізнесмэн,

Віталь Гуркоў — беларускамоўны чэмпіён свету па тайскім боксе,

Андрэй Караленка — 74-гадовы аматар бегу, на спартовай форме якога заўсёды ёсць месца нацыянальным сімвалам.

Пераможцам быў абвешчаны Віталь Гуркоў.

«Змагар года»

Асобамі, што смела і прынцыпова абаранялі дэмакратыю і правы чалавека, сталі:

Мікалай Аўтуховіч — ваўкавыскі прадпрымальнік,

удзельнікі Плошчы,

палітвязні з Плошчы,

Барыс Хамайда — распаўсюднік незалежнай прэсы,

Мікалай Казлоў — падпалкоўнік міліцыі які абнародаваў фальсіфікацыі парламенцкіх выбараў 2008 году.

Як заявілі арганізатары прэміі, адзінагалосна было вырашана ў гэтай намінацыі ўзнагародзіць палітвязняў з Плошчы. Памятны дыплом за ўсіх ахвяраў падзей 19 сакавіка прымалі праваабаронцы.

«Грамадская чыннасць»

Намінантамі тут сталі наступныя людзі і грамадзкія ініцыятывы, што спрычыніліся да вырашэння актуальных праблемаў беларускага грамадзтва:

«Стоп-бензін» — кампанія аўтааматараў супраць падвышэння цэнаў на бензін,

Хельсінскі камітэт і «Вясна» — праваабарончыя арганізацыі,

«Сыходзь» — грамадская ініцыятыва,

Даша Каткоўская — арганізатарка дапамогі затрыманым і арыштаваным на Плошчы-2010,

«Абаронім лес» — кампанія супраць вырубкі лесапаркавых зон у Салігорску.

Ад імя БХК і «Вясны» — пераможцаў — дыплом атрымаў Алесь Бяляцкі.

На заканчэнне імпрэзы прысутныя паслухалі выступ Таццяны Беланогай і працягнулі абмеркаванне ўзнагарод у нефармальнай абстаноўцы.

Нагадаем, што пераможцамі 2010 году былі: у намінацыі «беларусізацыя» — кампанія «Будзьма», «Pro-Belarus» — пасол Швецыі Стэфан Эрыксан, «журналістыка» — газета «Наша Ніва», «культура» — Мікалай Халезін і «Свабодны тэатр», «палітыка» — старшыня Партыі БНФ Аляксей Янукевіч, «грамадская чыннасць» — Міхаіл Пашкевіч за стварэнне кампаніі «За альтэрнатыўную службу», «спорт» — фанацкая ініцыятыва па аднаўленні футбольнага клуба «Тарпеда», «змагар года» — палітвязень Арцём Дубскі, які ў той час адбываў пакаранне ў магілёўскай калоніі.

* * *

«Каго любіш?» — «Люблю Беларусь!» — «Дык узаемна!» — гэта быў пароль і водгук паўстанцаў Каліноўскага.

Cяргей Гудзілін, "Наша Ніва"