«Трэба больш размаўляць на беларускай мове», — міністар замежных справаў Беларусі Ўладзімер Макей

Міністар замежных справаў Беларусі Ўладзімер Макей сказаў гэта ў інтэрвію Радыё Свабода падчас урачыстасьцяў у Празе, прысьвечаных 500-м угодкам выданьня скарынаўскай Бібліі.

«Усё залежыць ад самога чалавека. Калі ты беларус, калі разумееш, што бяз мовы ня можа быць краіны — будзе і мова жыць, і краіна разьвівацца. Але нічога не павінна рабіцца штучна, а павінна ісьці ад душы, ад сэрца. МЗС спрабуе зрабіць свой унёсак у разьвіцьцё беларускай мовы. Напрыклад, пазаўчора мы ў Мадрыдзе правялі выдатнае мерапрыемства: гішпанская дзяўчына пераклала на гішпанскую мову Максіма Багдановіча, выдатна гаворыць па-беларуску — гэта прыклад для многіх беларусаў, якія саромеюцца, магчыма, размаўляць па-беларуску. Трэба больш размаўляць на беларускай мове. Мы спрабуем гэта рабіць у нашым міністэрстве і заахвочваць людзей. Але ўсё павінна ісьці ад душы, ад сэрца».

У Празе адбываецца міжнародны сымпозіюм «Францішак Скарына і Прага», арганізаваны Нацыянальнай бібліятэкай Чэхіі, Нацыянальнай бібліятэкай Беларусі і амбасадай Беларусі ў Празе. Кветкі да памятнай дошкі Францішку Скарыну разам з удзельнікамі сымпозіюму ўсклаў міністар замежных справаў Беларусі Ўладзімер Макей. Уладзімер Макей падараваў Нацыянальнай бібліятэцы Чэхіі і мастацкаму музэю факсымільнае выданьне скарынаўскай Бібліі.

“Радыё Свабода”


Текст сообщения*
Загрузить файл или картинкуПеретащить с помощью Drag'n'drop
Перетащите файлы
Ничего не найдено
Отправить Отменить
Защита от автоматических сообщений
Загрузить изображение