О, край родны, край прыгожы!

Самарская абласная грамадская арганізацыя беларусаў і выхадцаў з Беларусі “Руска-Беларускае Братэрства 2000” працягвае актыўную працу па развіцці партнёрскіх адносін у пытаннях сацыяльна-эканамічнага, інфармацыйнага, адукацыйнага, спартыўнага і культурнага супрацоўніцтва з арганізацыямі і ўстановамі гістарычнай радзімы – Рэспублікі Беларусь.

У першай палове красавіка рабочая група ў складзе: Ірыны Глускай, прэзідэнта САГА “Руска-Беларускае Братэрства 2000”, Мікалая Бойкі, кіраўніка прэс-службы і галоўнага рэдактара часопіса “Адзiнства”/“Единство”, Іны Сухачэўскай, выканаўчага дырэктара арганізацыі, здзейсніла візіт у Мінск. Час паездкі ў сталіцу Беларусі, быў абраны не выпадкова: з 7 па 13 красавіка ў Мінску і Мінскай вобласці праходзіла творчая стажыроўка кіраўнікоў замежных беларускіх аматарскіх калектываў мастацкай творчасці, арганізаваная Міністэрствам культуры Рэспублікі Беларусь і Рэспубліканскім цэнтрам нацыянальных культур.

– Непасрэдныя зносіны з калегамі дазваляюць падзяліцца вопытам, унесці новыя элементы ў дзейнасць нашых арганізацый і калектываў мастацкай творчасці, – перакананая Ірына Глуская.


01.jpg

Прэзідэнт САГА “Руска-Беларускае Братэрства 2000” Ірына Глуская ўручыла ўзорнаму дзіцячаму хору “Крынічка” (кіраўнік Яўгенія Фурс) фестывальную статуэтку, дыплом лаўрэата I ступені і салодкія падарункі.

Праграма рабочага візіту беларусаў Самарскай вобласці была вельмі насычанай. Сустрэчы з кіраўніцтвам сталічных раёнаў, навучальных устаноў, знаёмства з гістарычнай спадчынай Беларусі, а яшчэ трэба было паспець наведаць важныя мерапрыемствы, якія праводзіліся ў рамках творчай стажыроўкі.

Развіццё партнёрскіх адносін

15 снежня 2005 года было падпісана пагадненне паміж Урадам Самарскай вобласці і Урадам Рэспублікі Беларусь аб гандлёва-эканамічным, навукова-тэхнічным і культурным супрацоўніцтве, 25 мая 2000 года падпісана пагадненне аб супрацоўніцтве Самары з Гомелем, а 11 мая 2001 года – з Віцебскам. Падчас правядзення V Форуму рэгіёнаў Беларусі і Расіі 12 кастрычніка 2018 года былі падпісаныя дакументы паміж прадстаўнікамі Самарскай губернскай думы і Магілёўскім абласным Саветам дэпутатаў, а таксама кіраўніком Самары Аленай Лапушкінай і старшынёй Магілёўскага гарвыканкама Уладзімірам Цумаравым аб супрацоўніцтве паміж гарадамі. Акрамя гэтага губернатар Самарскай вобласці Дзмітрый Азараў і старшыня Гомельскага абласнога выканаўчага камітэта Уладзімір Дворнік падпісалі пагадненне аб супрацоўніцтве паміж рэгіёнамі.

Сваю лепту ў развіццё партнёрскіх сувязяў з гістарычнай радзімай уносіць і “Руска-Беларускае Братэрства 2000”. 2 лiпеня 2014 года самарскія беларусы падпісалі Пагадненне аб развіцці партнёрскіх адносін з адміністрацыяй Заводскага раёна беларускай сталіцы. Гэтае супрацоўніцтва працягваецца, пра што сведчыць сустрэча кіраўніка адміністрацыі Заводскага раёна Мінска Сяргея Масляка з прэзідэнтам “Руска-Беларускае Братэрства 2000” Ірынай Глускай падчас сёлетняга візіту самарскіх беларусаў. У мерапрыемстве таксама прымалі ўдзел намеснік кіраўніка адміністрацыі Алена Зелянко і загадчык сектара культуры Упраўлення ідэалагічнай работы, культуры і па справах моладзі Дзмітрый Сямёнаў.

У ходзе перагавораў былі абмеркаваны пытанні развіцця і далейшага ўмацавання супрацоўніцтва і ўзаемадзеяння. На знак дружбы і партнёрства ўдзельнікі сустрэчы абмяняліся памятнымі сувенірамі.


02.jpg

Сустрэча кіраўніка адміністрацыі Заводскага раёна г. Мінска Сяргея Масляка з прэзідэнтам САГА “Руска-Беларускае Братэрства 2000” Ірынай Глускай.

У рамках візіту прадстаўнікі беларусаў Самарскай вобласці наведалі мінскую сярэднюю школу №77. Партнёрскія адносіны нашых самарскіх суайчыннікаў з гэтай адукацыйнай установай пачаліся ў 2014 годзе. Менавіта тады педагогі і вучні 82-й (цяпер 36-й) гарадской акругі Самара, якая шмат гадоў супрацоўнічае з арганізацыяй самарскіх беларусаў, на вясновых канікулах вырашылі наведаць Беларусь. Пасля гэтага творчыя калектывы школы – узорны ансамбль скрыпачоў і віяланчэлістаў “Элегія” (кіраўнік Жанна Бялова), узорны дзіцячы хор “Крынічка” (кіраўнік Яўгенія Фурс) і ўзорны аркестр народных інструментаў (кіраўнік Ірына Уладзімірава) прымаюць удзел у беларускім дзіцяча-юнацкім фестывалі-конкурсе мастацтваў “Беларусь – мая песня!”, які штогод праходзіць у Самары.

У мінулым годзе ўзорны “Крынічка” таксама прымала ўдзел у гэтым фестывалі, і Ірына Глуская, наведаўшы школу падчас візіту ў Мінск, уручыла таленавітаму творчаму калектыву фестывальную статуэтку, дыплом лаўрэата I ступені і салодкія падарункі.

– Кожны раз, калі я сустракаюся з нашымі партнёрамі ў Мінску, мяне не пакідае адчуванне, што я прыехала да вельмі блізкіх сяброў. І ў гэты раз нас вельмі цёпла сустракалі і ў Заводскім раёне сталіцы і ў 77-й школе, у якой пануе атмасфера павагі да калег, любоў да вучняў, высокая якасць навучання і выхавання. У гэтым я змагла пераканацца ў ходзе экскурсіі па школе, якую правяла дырэктар Алена Рыбалтоўская, таленавіты кіраўнік і вельмі душэўны чалавек. Яна пазнаёміла нас з цудоўным педагагічным калектывам, паказала ўтульныя і вельмі прыгожа аформленыя класы, – дзеліцца сваімі ўражаннямі Ірына Міхайлаўна.


03.jpg

Сустрэча з любімым беларускім народным фальклорным ансамблем “Вербіца” (мастацкі кіраўнік – Аляксандр Свірскі).

Сапраўды, Беларусь багатая на таленавітых і душэўных людзей. Запомніцца беларусам Самарскай вобласці і сустрэча з дырэктарам Рэспубліканскага цэнтра нацыянальных культур Вольгай Антоненка. Дарэчы, і з гэтай установай самарскія беларусы працягваюць развіваць партнёрскія адносіны. Мы ўбачылі грандыёзны вынік працы калектыву, які яна ўзначальвае, у справе арганізацыі і правядзення творчай стажыроўкі кіраўнікоў замежных беларускіх аматарскіх калектываў мастацкай творчасці. Кожнае мерапрыемства Міжнароднага творчага форуму было дасканальна прадумана як па форме, гэтак і па змесце.

Замалёўкі з творчай стажыроўкі

Мы ні на імгненне не пашкадавалі, што здолелі знайсці час для ўдзелу ў шэрагу мерапрыемстваў па плане творчай стажыроўкі.

– Стажыроўка была вельмі насычанай і разнапланавай, нас вучылі, як народным бытавым танцам і песням, гэтак і прыкладным відам мастацтва – пляценню з саломкі, вырабу гліняных цацак. Вельмі спадабаліся майстар-класы па тэатралізацыі народных песень.

Прафесар Міхаіл Дрынеўскі, мастацкі кіраўнік і галоўны дырыжор Нацыянальнага акадэмічнага народнага хору Рэспублікі Беларусі імя Г.Цітовіча, правёў у Нацыянальным акадэмічным Вялікім тэатры оперы і балета Рэспублікі Беларусь для ўдзельнікаў стажыроўкі грандыёзны практычны занятак падчас рэпетыцыі заслужанага беларускага калектыву.


04.jpg

Яшчэ на ўездзе ў Лагойск гасцей сустракалі песнямі, танцамі і духмяным караваем.

– Безумоўна, усе атрыманыя веды і досвед я буду выкарыстоўваць у падрыхтоўцы нашых беларускіх творчых калектываў у Самары, – дзеліцца сваімі ўражаннямі Іна Сухачэўская, мастацкі кіраўнік беларускага вакальнага ансамбля “Каданс” і ўзорнага дзіцячага вакальнага ансамбля “Очарование”.

Хачу адзначыць, што беларусаў Самарскай вобласці на творчай стажыроўцы прадстаўляла і Вера Сальнікава, мастацкі кіраўнік беларускага харэаграфічнага ансамбля “Сяброўкі” і дзіцячага харэаграфічнага ансамбля “Ровесник”, настаўніца школы №124 гарадской акругі Самара – творчага партнёра арганізацыі беларусаў. Яна ўпершыню наведала Беларусь і, вядома, была зачараваная беларускай гасціннасцю і прыгажосцю зямлі сваіх продкаў.

Запомніцца нашым самарскіх суайчыннікам і экскурсія ў Храм-помнік у гонар Усіх Святых. Пачалася яна з наведвання крыпты, дзе пахаваныя парэшткі невядомых салдат трох войнаў – 1812 года, Першай і Другой сусветных войнаў. У сценах крыпты 504 нішы для зямлі з месцаў бітваў і трагедый, дзе праліта кроў нашых суайчыннікаў... Ёсць у крыпце таксама ніша, дзе захоўваецца капсула з фрагментамі абшыўкі атамнага ракетнага крэйсера К-141 “Курск”, які трагічна загінуў падчас вучэнняў у Баранцавым моры 12 жніўня 2000 года. Сярод 118 членаў экіпажа было трое беларусаў – капітан 2-га рангу, старшы памочнік камандзіра “Курска” Сяргей Дудко, які нарадзіўся ў Пінску. Ураджэнец Гомельшчыны капітан 3-га рангу Аляксандр Садкоў, які камандаваў баявой часткай 7. Беларускія карані меў і старшына 2-га артыкула кантрактнай службы, камандзір аддзялення рулявых-сігнальшчыкаў Дзмітрый Лявонаў. Экскурсія ў Храм-помнік пакідае ў душы моцныя ўражанні, дапамагае цалкам па-новаму зірнуць на навакольны свет.


05.jpg

Удзельнікі творчай стажыроўкі і госці з народным ансамблем народнай песні “Шчодрыца” (мастацкі кіраўнік Ларыса Лашкевіч).

Сустрэча з сябрамі – заўсёды радасць. Натуральна, самарскія беларусы не маглі ўпусціць магчымасць сустрэчы з беларускім народным фальклорным ансамблем “Вербіца” (мастацкі кіраўнік – Аляксандр Свірскі). Для ўдзельнікаў стажыроўкі гэты творчы калектыў правёў майстар-клас па выкананні беларускіх народных песень і танцаў. Упершыню самарскія беларусы сустрэліся з самабытным ансамблем “Вербiца” ў 2014 годзе і адразу палюбілі творчасць гэтага калектыву.

– Сустрэча з любімым калектывам “Вербiца” для нас заўсёды свята. І гэтым разам быў вельмі душэўны прыём. Удзельнікі ансамбля правялі практычны занятак па выкананні песень на беларускай, польскай і іншых мовах. Паказалі харэаграфічныя элементы, ды так паказалі, што мы не змаглі ўседзець на месцы і пабеглі з імі ў скокі, – не хаваючы сваіх эмоцый, кажа Іна Сухачэўская.

У праграме стажыроўкі значылася і наведванне Лагойска, куды арганізатары і нас ласкава запрасілі паехаць з усімі ўдзельнікамі стажыроўкі, каб на свае вочы ўбачыць прыгажосці “беларускай Швейцарыі”.

Паездка ў беларускую Швейцарыю

Менавіта так за маляўнічую пагорыстую мясцовасць, называюць Лагойшчыну. Характэрнай геаграфічнай асаблівасцю рэгіёна з'яўляецца яшчэ і тое, што па тэрыторыі раёна праходзіць водападзел Балтыйскага і Чорнага мораў.

Яшчэ на ўездзе ў Лагойск нас сустрэлі песнямі, танцамі і духмяным караваем. І такая атмасфера панавала цэлы дзень, пакуль мы там знаходзіліся. Творчыя калектывы горада прадставілі гасцям канцэртную праграму “Кірмашовыя забавы”. Са сцэны Дома культуры гучалі беларускія песні і танцы ў выкананні народнага ансамбля песні “Лагойская жывіца” (мастацкі кіраўнік Міхаіл Дуганаў), народнага ансамбля фальклорна-бытавога танца “Суботка” (мастацкі кіраўнік Наталля Гушчына) і народнага ансамбля народнай песні “Шчодрыца” (мастацкі кіраўнік Ларыса Лашкевіч). Для ўдзельнікаў творчай стажыроўкі народны ансамбль народнай песні “Шчодрыца” правёў майстар-клас па працы з аматарскімі калектывамі мастацкай творчасці.

Самарскім беларусам было прыемна пачуць, што ў 2002 годзе мастацкім кіраўніком гэтага калектыву быў Сяргей Шарамецьеў – у Самары яго ведаюць як дарадцу кіраўніка Пасольства Рэспублікі Беларусь у Расійскай Федэрацыі. Гэтую пасаду Сяргей Іванавіч займаў з 2014 па 2018 гады. 15 лістапада 2018 года ён прызначаны на пасаду намесніка Міністра культуры Рэспублікі Беларусь.


06.jpg

Разам з сябрамі ў Рэспубліканскім цэнтры нацыянальных культур

Праграма знаходжання на Лагойшчыне была вельмі насычанай, але Ірына Глуская ўсё ж знайшла хвіліну, каб сустрэнецца з начальнікам аддзела ідэалагічнай работы, культуры і па справах моладзі Лагойскага райвыканкама Аленай Сяліцкай і абгаварыць магчымасць падпісання пагаднення аб партнёрстве ў рамках праекта “Адміністрацыйны рэгіён Беларусі – арганізацыя суайчыннікаў за мяжой”.

Замест заключэння

Рабочы візіт беларусаў Самарскай вобласці ў Мінск завершаны. Было шмат цікавых сустрэч са старымі сябрамі-партнёрамі і новых знаёмстваў... Самарскія беларусы на пляцоўцы Рэспубліканскага цэнтра нацыянальных культур сустрэліся з Міхаілам Рыбаковым, які цяпер працуе ў Дзяржаўным музеі гісторыі беларускай літаратуры, і нашым добрым сябрам – рэдактарам газеты “Голас Радзімы” Іванам Ждановічам, і абмеркавалі з імі пытанні далейшага партнёрства.

Ірына Глуская адзначае, што праграма візіту на гістарычную радзіму выкананая цалкам. Наперадзе – вялікая работа па рэалізацыі задач сацыяльна-эканамічнага і культурнага развіцця нашых рэспублік, выкарыстоўваючы магчымасці нашых суайчыннікаў у Самарскай вобласці.

Мікалай Бойка, “Руска-Беларускае Братэрства 2000”