Шэсце на Дзень Волі ў Варшаве

У польскай сталіцы 23 сакавіка пачаліся святкаванні з нагоды 95-й гадавіны абвяшчэння БНР.

У польскай сталіцы 23 сакавіка пачаліся святкаванні з нагоды 95-й гадавіны абвяшчэння БНР.

Каля ста чалавек узялі ўдзел у шэсці па вуліцах Варшавы з нагоды 95-ай гадавіны абвяшчэння Беларускай Народнай Рэспублікі.

А 13-й гадзіне беларусы Варшавы сабраліся на плошчы Трох Крыжоў. Над удзельнікамі шэсця ўзвышаліся дзясяткі бел-чырвона-белых палотнішчаў, а таксама сцягі Польшчы й Еўрасаюза.

Кажа арганізатар акцыі, сустаршыня Беларускага дому ў Варшаве Зміцер Бародка: «Мы — беларусы, гэта нашае нацыянальнае свята, і дзе б мы ні былі, мы павінныя гэтую дату ўшаноўваць. 95 гадоў таму нашыя продкі заклалі першы камень у падмурак нашай дзяржавы, а мы гэтую справу павінны завяршыць — адбудаваць наш беларускі дом»

Шэсце вырушыла а 13.30 па так званым Каралеўскім тракце — вуліцамі Новы Свет і Кракаўскае прадмесце ў цэнтры Варшавы.

А 14.00 на Замкавай плошчы ў Старым горадзе пачаўся мітынг.

На мітынгу выступіў старшыня КХП-БНФ Зянон Пазняк: «Мы цяпер у такой сітуацыі, што можам разлічваць перадусім на ўласныя сілы. Памятайма пра гэта. Няхай прыкладам нам будуць нашыя героі, якія змагаліся ў 1918 годзе, і тыя людзі, што дамагліся незалежнасці ў 1991-м».​​

Прамаўлялі таксама Зміцер Бародка ды Наталля Радзіна.

Прысутныя дзякавалі за салідарнсць палякам, скандуючы па-польску «Менск і Варшава — супольная справа».

Пасля мітынгу можна было пачаставацца беларускімі стравамі.

"Наша Ніва"