У Францыі патрабуюць арыштаваць міністра унутраных спраў Беларусі Анатоля Куляшова

Анатоль КуляшоўФранцузскі адвакат Уільям Бурдон 19 студзеня ў Парыжы падаў судовы іск супраць міністра ўнутраных спраў Беларусі Анатоля Куляшова, які знаходзіцца ў Францыі. Адвакат Бурдон дзейнічае ад імя пяці беларусаў.

Анатоль Куляшоў. Фота Французскі адвакат Уільям Бурдон 19 студзеня ў Парыжы падаў судовы іск супраць міністра ўнутраных спраў Беларусі Анатоля Куляшова, які знаходзіцца ў Францыі.

Як паведаміла БелаПАН памочніца Уільяма Бурдона, Куляшова абвінавачваюць у катаваннях. Адвакат Бурдон дзейнічае ад імя пяці беларусаў.

"Шансы, што спадара Куляшова арыштуюць, даволі высокія, і мы на гэта разлічваем", — адзначыла памочнік адваката. Яна не сказала, чые менавіта інтарэсы прадстаўляе адвакат. Разам з тым грамадзянская ініцыятыва Free Belarus Now распаўсюдзіла заяву аб тым, што Бурдон дзейнічае ад яе імя. Ініцыятыва Free Belarus Now заснавана сем`ямі апазіцыйных палітыкаў і журналістаў, якія былі арыштаваны падчас разгону дэманстрацыі 19 снежня 2010 года ў Мінску. Як паведамлялася раней, беларуская дэлегацыя на чале з Анатолем Куляшовым бярэ ўдзел у перамовах, якія праходзяць 17—20 студзеня ў Ліёне ў Генеральным сакратарыяце Інтэрпола. Міністр Куляшоў уключаны ў спіс беларускіх чыноўнікаў, якім забаронены ўезд на тэрыторыю Еўрасаюза ў сувязі з парушэннем у Беларусі стандартаў правядзення выбараў. Але візавыя санкцыі ЕС не дзейнічаюць у выпадках, калі чыноўнікі наведваюць мерапрыемствы міжнародных арганізацый. Французская віза кіраўніку МУС Беларусі выдадзена па просьбе Інтэрпола. "Францыя выканала абавязацельствы дзяржавы, якая прымае на сваёй тэрыторыі міжнародныя арганізацыі", — растлумачылі БелаПАН 17 студзеня ў пасольстве Францыі. Пры гэтым у дыппрадстаўніцтве адзначылі, што гэта не шэнгенская віза, а "віза тэрытарыяльна абмежаванага дзеяння", якая дае права толькі на наведванне Францыі. Яна выдадзена на тэрмін афіцыйнай паездкі. Акрамя таго, паведамілі ў пасольстве, гэта не двухбаковы візіт: падчас паездкі не прадугледжваецца ніякіх кантактаў беларускага міністра з прадстаўнікамі Францыі. Уільям Бурдон нарадзіўся ў 1956 годзе. Спецыялізуецца на абароне правоў чалавека і ахвяр злачынстваў супраць чалавечнасці. У 1995—2000 гадах быў генеральным сакратаром Міжнароднай федэрацыі правоў чалавека. "Ён быў вельмі актыўны ў ініцыяванні юрыдычных працэдур у Францыі супраць былых лідараў Сербіі ці Руанды, якіх падазравалі ў злачынствах супраць чалавечнасці і ваенных злачынствах", — паведамляе сайт праваабарончай арганізацыі Human Rights Watch. Бурдон таксама прадстаўляе сем`і ахвяр чылійскага дыктатара Аўгуста Піначэта і некаторых французскіх вязняў амерыканскай турмы ў заліве Гуантанама (Куба).

Антон Тарас, БелаПАН