У Варшаве афіцыйна пачаў працу Прэс-Клуб Беларусь

29 чэрвеня ў Варшаве афіцыйна пачаў працу Прэс-Клуб Беларусь. Заснаванне клубу ініцыяваў шэраг знаных беларускіх медыя-асобаў.

На мэце клубу, — дапамагчы беларускім журналістам і іншым медыя-персонам у працы дзеля дэмакратычнай Беларусі і свабоды слова медыяў. Падтрымаў ініцыятыву Прэс-Клуб Польшча.

Сярод заснавальнікаў клубу, — выключна беларусы, — вядомыя журналісты, рэдактары і выдаўцы незалежных беларусіх СМІ: Юлія Слуцкая, Зміцер Новікаў, Аляксандр Старыкевіч, Алесь Ліпай, Аляксандр Уліцёнак, Аляксей Дзікавіцкі, Пётр Марцаў, Віктар Марціновіч.

У сустрэчы ўзялі ўдзел беларускія журналісты, якія працуюць на Беларусь па-за яе межамі, у тым ліку ў Варшаве; еўрапейскія журналісты, якія пішуць пра Беларусь; сябры Press Club Polska.

Пакуль што Прэс-Клуб Беларусь будзе працаваць у Варшаве, на платформе і пры падтрымцы Прэс-Клубу Польшча. «Паводле правілаў сеткі міжнародных клубаў, яны могуць існаваць толькі ў краінах, дзе свабода слова, — не пусты гук, а дзейснае паняцце.

І як толькі свабода слова станецца ў Беларусі рэчаіснасцю, прэс-клуб Беларусь будзе функцыянаваць непасрэдна ў Беларусі.

І менавіта дзеля таго, каб перадумовы для гэтага былі, — мы сёння пачынаем працу нашага клубу», — сказала на першай сустрэчы Прэс-Клубу Беларусь адна з яго заснавальнікаў Юлія Слуцкая.

Яраслаў Владарчык, прэзыдэнт Press Club Polska, падкрэсліў, што адна з функцый прэс-клуба, — стаць плённай камунікацыйнай платформай для людзей, што працуюць на медыя-прасторы.

"Наша Ніва"