У Варшаве пачаліся заняткі пятага набору «каліноўцаў»

Адукацыйная праграма Кастуся Каліноўскага – выратаванне для многіх беларускіх маладзёнаў, якія жадаюць атрымаць вышэйшую адукацыю і не намераны адмаўляцца ад грамадзянскай актыўнасці, – упэўненая Іна Кулей.

Па словах кіраўніцы Камітэта абароны рэпрэсаваных «Салідарнасць», праваабаронцы раяць кожнаму студэнту, на якога аказваецца ціск на вучобе, не здавацца і да апошняга абараняць свае правы, каб не дазволіць уладам потым казаць пра адсутнасць такога пераследу.

У панядзелак, 21 сакавіка, у Варшаве ўрачыста распачаліся заняткі ўжо пятага пазачарговага набору беларускіх студэнтаў, што перацярпелі пераслед на радзіме.

Іна Кулей гаворыць, што кіраўніцтва камітэта «Салідарнасць» прыкладае ўсе намаганні дзеля дапамогі рэпрэсаваным:

– Па-першае, мы ўвесь час трымаем з імі кантакт. Па-другое, моладзь на праграме імя Каліноўскага альбо на праграме ЕГУ, альбо тыя, хто вучыцца ва Украіне ці іншых краінах – яны ангажаваныя ў сумесныя праграмы. Некаторыя з іх, хто не можа прыехаць, удзельнічаюць у праграмах новай беларускай дыяспары, якую стварыў Павел Марозаў разам са сваімі паплечнікамі. Ёсць праграмы, якія нават у замежжы даюць магчымасць удзельнічаць у справах Беларусі – гэта вельмі важна.

Паводле Іны Кулей, у выніку актыўных дзеянняў лік адлічаных студэнтаў у гэтым годзе ідзе не на сотні, як гэта было ў прэзідэнцкую кампанію 2006 года, а пакуль на дзясяткі. Згодна са звесткамі Камітэта абароны рэпрэсаваных, урад Польшчы ўжо зацвердзіў на гэты год магчымасць атрымання 150 стыпендый для студэнтаў – 50 для дактарантаў і 10 навуковых стыпендый для выкладчыкаў, што патрапілі пад пераслед на працы.

Барыс Гарэцкі, "Радыё Рацыя"