Дванаццаты раз у Беларускім ліцэі ў Гайнаўцы (Польшча) збяруцца лепшыя расказчыкі, каб пазмагацца ў спаборніцтвах красамоўства і дасціпнасці.

Конкурс беларускай гавэнды, па словах яго арганізатара, настаўніка беларускай мовы Яна Карчэўскага, гэта добры спосаб захавання традыцый.

- Ідэя, зразумела, гэта падтрыманне беларускай мовы як літаратурнай, так і дыялектнай на Гайнаўшчыне, на Беласточчыне. Папулярызацыя беларускіх твораў, народных расказаў, легендаў, казак. А таксама вучні развіваюць свае здольнасці выступленняў перад шырэйшай публікай на сцэне.

На конкурсе гучаць як творы вядомых беларускіх пісьменнікаў, так і адмыслова напісаныя тэксты, аўтарамі якіх з’яўляюцца настаўнікі або самі вучні. У конкурсе могуць прымаць удзел як адзіночныя выступоўцы, так і дуэты. Спаборніцтвы праводзяцца ў трох узроставых катэгорыях.

Сёлета за званне лепшага расказчыка змагаюцца 19 удзельнікаў з розных школ Гайнаўскага павета.

Наталля Герасімюк, “Радыё Рацыя”