Анкета Свабоды: Янка Запруднік

Беларуска-амэрыканскі гісторык і публіцыст, адзін з самых актыўных дзеячаў беларускай дыяспары ў ЗША, ганаровы сябра Беларускага ПЭН-цэнтру, сябра Вялікай Рады МГА "ЗБС "Бацькаўшчына".

Беларуска-амэрыканскі гісторык і публіцыст, адзін з самых актыўных дзеячаў беларускай дыяспары ў ЗША, ганаровы сябра Беларускага ПЭН-цэнтру, сябра Вялікай Рады МГА "ЗБС "Бацькаўшчына".

Нарадзіўся 9 жніўня 1926 году ў мястэчку Мір. У часы Другой сусьветнай вайны скончыў Баранавіцкую прагімназію, потым вучыўся ў Баранавічах у гандлёвай школе. Сябра Саюзу Беларускай Моладзі (СБМ) З 1944 г. у Нямеччыне, затым працаваў на шахтах у Вялікай Брытаніі. У 1954 г. скончыў гістарычны факультэт Лювэнскага каталіцкага ўнівэрсытэту ў Бэльгіі. Потым працаваў на радыёстанцыі Вызваленьне (Радыё Свабода). З 1957 году ў ЗША. Абараніў у Нью-Ёркскім унівэрсытэце доктарскую дысэртацыю на тэму «Палітычнае змаганьне за Беларусь у Дзяржаўнай думе 1906-1917 гг.», выкладаў гісторыю ў вышэйшых навучальных установах ЗША. Жыве ў г.Сомэрсэт (штат Нью-Джэрсі, ЗША).

Што для вас свабода?

Магчымасьць рэалізаваць мае мэты.

 

Што найбольш абмяжоўвае вашу свабоду?

Дэфіцыт веды, сродкаў і часу.

Што для вас шчасьце?

Зьдзяйсьняць задуманае.

Чаго вы найбольш баіцеся?

Страціць здольнасьць да працы: мне йдзе ўжо 85-ы.

Які талент вы хацелі б мець?

Музычны.

Кім з сучасьнікаў вы захапляецеся?

Маладымі людзьмі, якія выяўляюць зацікаўленьне да беларушчыны.

Што вы найбольш любіце рабіць?

Чытаць, пісаць, сустракацца з суродзічамі.

Калі б можна было пражыць жыцьцё яшчэ раз, што б вы зьмянілі?

Працаваў бы над сабой больш сыстэматычна, не марнаваў бы часу.

Якую найлепшую параду вы атрымалі?

Ня падай духам, ня траць надзеі!

Які ваш улюбёны дэвіз?

Усё прыходзіць і праходзіць.

У якой палітычнай сыстэме вы хацелі б жыць?

У народнай рэспубліцы.

У якой краіне вы хацелі б жыць?

У свабоднай Беларусі.

У якую эпоху вы хацелі б жыць?

Найлепшая эпоха тая, у якой жыву.

Калі б вы сталі кіраўніком Беларусі, што б зрабілі найперш?

Увёў бы ва ўрад больш жанчын на галоўных пасадах.

Якія адносіны Беларусь павінна мець з Эўразьвязам?

Свабодныя ад усякага прымусу.

Якія адносіны Беларусь павінна мець з Расеяй?

Свабодныя ад усякага гвалту.

Некаторыя думаюць так: «Хай дыктатура, абы свая». А Вы?

Ацэнка дыктатуры залежыць ад мэты, якую дыктатура ставіць перад сабой.

Калі і як у Беларусі зьменіцца ўлада?

Калі да голасу прыйдзе новае пакаленьне, узгадаванае ў пашане да нацыянальнае дзяржаўнасьці.

Калі беларусы загавораць па-беларуску?

Стопрацэнтовыя беларусы гавораць па-беларуску цяпер.

Што будзе, калі беларусы не загавораць па-беларуску?

Застануцца на паўдарозе да свае поўнае дзяржаўнасьці.

"Радыё Свабода"