100 гадоў БНР: Віншаванне Галоўнай управы Беларуска-Амэрыканскага Задзіночаньня (БАЗА)

Паважаныя суродзічы!

Ад імя Галоўнай управы Беларуска-Амэрыканскага Задзіночаньня (БАЗА) віншуем вас з 100-мі ўгодкамі абвешчаньня Беларускай Народнай Рэспублікі!

Узгадваючы падзеі стогадовай даўніны і палітычнае становішча, у якім тады знаходзілася Беларусь, можна толькі здагадвацца, якіх высілкаў каштавала абвешчаньне БНР яе заснавальнікам. Адное зразумела, што айцы БНР спраўдзілі мару некалькіх пакаленьняў беларусаў, якія змагаліся за волю і незалежнасьць сваёй Бацькаўшчыны яшчэ з часоў Тадэвуша Касьцюшкі і Кастуся Каліноўскага.

Праз 73 гады пасьля абвешчаньня БНР, у 1991 годзе, беларусы ізноў атрымалі і не ўпусьцілі шанец адбудаваць сваю краіну – і так паўстала наша сеньняшняя Бацькаўшчына. Абвешчаньне БНР стала тым самым падмуркам, на якім збудавана Рэспубліка Беларусь.

Верым, што яшчэ прыйдзе той час, калі Беларусь стане сапраўды вольнай эўрапейскай дэмакратычнай краінай!

З удзячнасьцю і спадзяваньнем выказваем наш безумоўны давер Радзе БНР, якая ўжо 100 гадоў увасабляе і захоўвае ідэалы беларускай дзяржаўнасьці.

Жыве Беларусь!


Тэгі: БАЗА, БНР, ЗША