Урачыстае святкаванне 25-годдзя Латвійскага таварыства беларускай культуры “Сьвітанак” адбылося ў Рызе 11 студзеня. Сам юбілей быў 27 лістапада 2013 г., і спачатку ўрачыстасць мелася адбыцца ў лістападзе. Тады ж планавалі свой прыезд з Беларусі ў Рыгу намеснік старшыні Рады “Бацькаўшчыны” Барыс Стук і вядомы беларускі бард Зміцер Вайцюшкевіч. Аднак літаральна напярэдадні здарылася трагедыя: у адным з гандлёвых цэнтраў Рыгі абрынуўся дах, загінула шмат людзей. Натуральна, у краіне была абвешчаная жалоба, і святочнае мерапрыемства адклалі на пазнейшы час.

Зала ў культурна-мастацкім цэнтры “Рытумс”, дзе праходзіла мерапрыемства, сабрала і дзяцей, і дарослых самых розных узростаў. Вітанні, віншаванні, прамовы на адрас “Сьвітанка” гучалі на беларускай і латышскай мовах.

Беларуская дзяржава была прадстаўленая загадчыкам консульскага аддзела беларускага пасольства Андрэем Кажаном, які выступіў першым і сказаў шмат цёплых словаў на адрас “Сьвітанка”. Ён зачытаў віншавальны ліст ад Надзвычайнага і Паўнамоцнага пасла Рэспублікі Беларусь у Латвіі сп. Марыны Далгаполавай. Павіншаваў сьвітанкаўцаў і Улад Рэдзькін, кіраўнік Беларускага інфармацыйнага цэнтра ў Рызе.

Латышская дзяржава таксама не засталася ў баку ад святочнай падзеі - ліст з віншаваннямі таварыству даслаў прэзідэнт Латвіі Андрыс Берзіньш. У лісце ён асабліва адзначыў унёсак "Сьвітанка" ў дыялог латвійскай і беларускай культур. На святочным мерапрыемстве з вітаннем выступіла старшы рэферэнт аддзела грамадскай інтэграцыі ад Міністэрства культуры Латвіі Лінда Наўдышэ. Яна зачытала віншаванне ад Міністэрства культуры, а таксама ўзнагародзіла граматамі за значны ўнёсак у развіццё таварыства Ганну Іванэ – дырэктара Рыжскай беларускай школы імя Я. Купалы - і Наталлю Цімаховіч, найстарэйшага сябра «Сьвітанка» (ёй 87 гадоў), доктара фізіка-матэматычных навук, астрафізіка.

Наталля Пятроўна Цімаховіч атрымлівае Ганаровую грамату Міністэрства культуры Латвіі. Фота Георгія Астапковіча

Кіраўнік дэпартамента культуры, адукацыі і спорту ў Рыжскай думе Эйжэня Алдэрманэ зачытала віншаванне ад мэра Рыгі Ніла Ушакова. Эйжэня Алдэрманэ з вялікай сімпатыяй ставіцца да беларускай справы ў Рызе, і яна часты госць на культурных мерапрыемствах, якія ладзіць Рыжская беларуская школа.

Гасцінна сустрэла сяброў таварыства “Сьвітанак” Вія Ліетэ, дырэктарка культурна-мастацкага цэнтра “Рытумс”, які ўжо 10 гадоў супрацоўнічае са “Сьвітанкам” і падтрымлівае яго дзейнасць, у тым ліку дае памяшканні для мерапрыемстваў таварыства. І, відавочна, за падтрымку і доўгае сяброўства старшыня таварыства “Сьвітанак” Ірына Кузьміч у адрас Цэнтра выказала глыбокую падзяку.

“Сьвітанак” не толькі гуртуе беларусаў Рыгі, але і сябруе з іншымі нацыянальнымі меншасцямі, іх аб’яднаннямі, наведваюць мерапрыемствы адзін аднога, абменьваюцца досведам. 11-га студзеня павіншаваць “Сьвітанак” прыйшлі старшыня нямецкага таварыства Айна Балашка і старшыня польскага -- Эдвард Фісковіч.

У Латвіі працуе шмат беларускіх арганізацый. Павіншаваць “Сьвітанак” прыехалі беларусы Даўгаўпілса.

Натуральна, што такая падзея як юбілей у чвэрць стагоддзя не абышлася без былых старшыняў таварыства. На святкаванні прысутнічалі і Сяргей Кузняцоў, і Васіль Малышчыц, і Таццяна Казак, і канечне ж, адзін з заснавальнікаў “Сьвітанка” Вячка Целеш. Яны таксама павіталі гасцей і шчыра павіншавалі сяброў-сьвітанкаўцаў, выказаўшы радасць ад таго, што справа таварыства жыве і імпэт у яго сяброў не згасае.

"Сьвітанкаўцаў" і гасцей свята вітае першы старшыня таварыства Сяржук Кузняцоў. Фота Георгія Астапковіча

Да віншаванняў далучыўся латвійскі паэт, кавалер ордэна Трох зорак Улдыс Берзынш, які заўважыў, што, на яго думку, беларусы больш адкрытыя за латышоў.

Прадстаўнік Згуртавання беларусаў свету “Бацькаўшчына” Барыс Стук, віншуючы сьвітанкаўцаў, асабліва адзначыў ролю таварыства ў яднанні беларусаў Латвіі і захаванні беларускай культуры ў гэтай краіне. Адным з асабліва важных дасягненняў таварыства ён назваў адкрыццё беларускай школы ў Рызе.

Асобным святочным момантам было ўручэнне пасведчанняў да Юбілейнага медаля “20 год Першаму з’езду беларусаў свету”. Самі медалі былі ўручаныя Ганаровым сябрам “Бацькаўшчыны” – Вячку Целешу і Таццяне Казак – на Шостым з’ездзе беларусаў свету.

Натуральна, не абышлося без падарункаў. Барыс Стук уручыў сьвітанкаўцам памятны падарунак з нагоды юбілею – гадзіннік з выявай Мірскага замка, а таксама перадаў для біблятэкі кнігі, што былі нядаўна выдадзены Згуртаваннем “Бацькаўшчына”.

Барыс Стук уручае Ірыне Кузьміч ліст падзякі таварыству "Сьвітанак". Фота Георгія Астапковіча

Святочнага канцэрта з нецярпеннем чакалі ўсе.

Дзіцячы ансамбль “Вавёрачка”, які дзейнічае пры Рыжскай беларускай школе імя Янкі Купалы, выканаў некалькі беларускіх песень, прычым так прафесійна і так пранікнёна, што ў многіх былі слёзы на вачах. Ансамблю акампанавала яго кіраўнік, вядомая ў Латвіі піяністка  Наталля Дзірвук.

Барыс Стук адзначыў: “Дзеці выступалі вельмі прафесійна і паказалі прыстойны ўзровень. Такое цяжка пачуць сёння ў Беларусі. Яны спявалі сапраўды ад душы і шмат каго расчулілі. Калі глядзіш на гэтых дзяцей, гэтую моладзь, то бачыш, што ёсць перспектывы захавання беларускага жыцця ў Латвіі”.

Ансамбль "Вавёрачка". Фота Барыса Стука

Пасля дзіцячага калектыву перад гасцямі выступіў бард Зміцер Вайцюшкевіч - для латвійскіх беларусаў яго міні-канцэрт быў доўгачаканы. Вайцюшкевіч выконваў і новыя, і старыя свае песні, якім публіка ахвотна падпявала.

Зміцер Вайцюшкевіч. Фота Барыса Стука

Музыка быў вельмі задаволены цёплым прыёмам. “Прыемна, што сабраліся людзі розных узростаў. Я ўражаны, як многія сталыя людзі, якія ў Беларусі практычна не жылі, цудоўна размаўляюць па-беларуску, - гаворыць Вайцюшкевіч. - Уражаны і тым, што ў Рызе ёсць беларуская школа - раней не ведаў гэтага. Было прыемна пачуць дзіцячы ансамбль, яны вельмі добра спявалі. Я рады таму, што пазнаёміўся тут з многімі цудоўнымі людзьмі. Шмат гутарыў з Вячкам Целешам. Тое, што тут няма канфрантацыі беларускай і латвійскай культур, а ёсць, наадварот, узаемная падтрымка, мне вельмі даспадобы. У маіх планах - вярнуцца ў Рыгу ізноў”.

Пасля ўрачыстай вечарыны адбыўся святочны фуршэт. Госці гутарылі ў нефармальнай атмасферы, знаёміліся між сабой, а таксама змаглі пачуць выступ гурта аматараў беларускай песні "Вытокі".

Ансамбль "Вытокі" спявае пад акампанемент Змітра Вайцюшкевіча. Фота Барыса Стука

“Увогуле, - дзеліцца ўражаннямі Барыс Стук, - на святкаванні панавала сяброўская атмасфера. Выступы былі шчырыя, адчувалася згуртаванасць людзей, іх апантанасць сваёю справай. Радуе, што гэтак жа апантаная справай і новы кіраўнік таварыства “Сьвітанак” Ірына Кузьміч. Безумоўна, ёй даводзіцца цяжка, бо раней у яе не было вопыту кіраўніцтва грамадскай арганізацыяй, але яна мае цёплую падтрымку сяброў. Якраз на сяброўстве, на супольнай дзейнасці будуецца дзейнасць “Сьвітанка”. Сябры таварыства - людзі розных узростаў, розных сацыяльных становішчаў, якія змаглі згуртавацца і з імпэтам працаваць разам. Я думаю, у “Сьвітанка” і далей будуць добрыя справы і новыя здабыткі”.

Старшыня Латвійскага таварыства беларускай культуры Ірына Кузьміч падсумавала: “Усё прайшло выдатна. Хоць святкаванне і давялося перанесці і мы шмат абмяркоўвалі, як і калі яго лепей зрабіць, затое цяпер бачым - свята нашае атрымалася. Мы ўбачылі, што нашая праца сапраўды, усур’ёз патрэбная людзям, і гэта, безумоўна, натхняе”.

Інфармацыйны цэнтр МГА “ЗБС “Бацькаўшчына”

Раім таксама пачытаць: