Беларуска вылучаная на пасаду генсакратара АБСЕ

Пастаяннага прадстаўніка Беларусі пры Арганізацыі па бяспецы і супрацоўніцтве ў Еўропе Алену Купчыну вылучылі на пасаду генсакратара гэтай арганізацыі. Пра гэта паведаміў начальнік упраўлення інфармацыі — прэс-сакратар МЗС Беларусі Дзмітрый Мірончык.

Фота: sb.by

Паўнамоцтвы цяперашняга генсакратара італьянца Ламберта Дзаньера завяршаюцца 30 чэрвеня 2017 года. Таму Беларусь вылучыла сваю кандыдатуру.

"Гэта рашэнне прадыктаванае шчырым імкненнем Беларусі зрабіць унёсак ва ўмацаванне АБСЕ ў інтарэсах усіх дзяржаў-удзельніцаў. У сітуацыі вострых рэгіянальных канфліктаў, росту супярэчнасцяў паміж сусветнымі гульцамі, роля Арганізацыі па бяспецы і супрацоўніцтве ў Еўропе зноў вельмі важная", — патлумачыў Мірончык.

Алена Купчына доўгі час працавала намесніцай міністра замежных спраў Беларусі. Як падкрэсліў Мірончык, яна прымала самы непасрэдны ўдзел у рэалізацыі знешняй палітыкі нашай краіны, накіраванай на ўмацаванне бяспекі і стабільнасці ў Еўропе.

Прэс-сакратар МЗС паведаміў, што 14 сакавіка ў Вене прайшлі першыя слуханні прэтэндэнтаў на пасаду генсакратара АБСЕ. Кандыдаты прадставілі пастаянным прадстаўнікам дзяржаў-удзельніцаў АБСЕ свае прыярытэты.

euroradio.fm