Знойдзеныя новыя звесткі пра зніклы беларускі горад Казімір

Выяўленыя новыя звесткі пра зніклы беларускі горад Казімір. Нагадаем, ён існаваў у XVII стагоддзі на тэрыторыі сучаснага Светлагорскага раёна, меў Магдэбургскае права, і быў разбураны ў 1655 годзе падчас вайны з маскоўскай дзяржавай.

Дакумент пра існаванне Казіміра знайшоў у 2001 годзе прафесар Сяргей Рассадзін. Ён арганізаваў два гады таму археалагічныя раскопкі на месцы, дзе, паводле яго меркавання, мог існаваць горад, нагадвае БелаПАН. Аднак існуе і нямала скептыкаў, якія лічаць, што Рассадзін праводзіць раскопкі не ў тым месцы.

І вось нядаўна была выяўленая яшчэ адна пісьмовая крыніца, якая сведчыць пра месцазнаходжанне Казіміра. У кнізе польскага гісторыка Вітальда Бярнацкага "Паўстанне Хмяльніцкага: вайсковыя дзеянні ў Літве у 1648-1649 гг.", пераклад якой на беларускую мову быў нядаўна апублікаваны, згадваецца "Казімеравая Слабада". Прафесар Рассадзін лічыць, што гэтая згадка пацвярджае слушнасць яго высноваў.

Паводле “Еўрапейскага радыё для Беларусі”