Дарога з Ватыкана

Днямі афіцыйна абвешчана аб вiзiце ў Беларусь дзяржаўнага сакратара Яго Святасцi Папы Бенедыкта XVІ кардынала Тарчызiа Бартанэ. Ён прыбудзе ў Беларусь спецрэйсам ўвечары 18 чэрвеня i застанецца да жалобнага для нашай краiны дня 22 чэрвеня. Гэта будзе вiзiт як дзяржаўнай, так i духоўнай асобы.

Кардынала Тарчызiа Бартанэ неафiцыйна называюць дзяржаўным сакратаром Ватыкана, гэта другая асоба ў каталiцкiм касцёле, таму падрыхтоўка да вiзiту вядзецца вельмi адказна.

— Кардынал Тарчызiа Бартанэ прыязджае па запрашэннi беларускага Ўрада, — адзначыў Мiтрапалiт Мiнска-Магiлёўскi арцыбiскуп Тадэвуш Кандрусевiч. — З аднаго боку, гэта дзяржаўны вiзiт, але ён датычыцца i спраў касцёла. Таму мы чакаем, што падчас вiзiту кардынал Бартанэ наведае Канферэнцыю Каталiцкiх Бiскупаў у Беларусi. Яго будуць чакаць у цэнтры "Карытас", якi месцiцца ля Бараўлянаў i апякае хворых на рак дзяцей. Малыя ў гэтым цэнтры знаходзяцца разам з мамамi, умовы там створаны вельмi добрыя, для кожнай мамы асобны пакой. У гэтым цэнтры мы не падзяляем хворых дзяцей на каталiкоў i не, iм патрэбна дапамога i падтрымка незалежна ад веравызнання i нацыянальнай прыналежнасцi. Найперш, духоўная падтрымка. Запланаваныя яго вiзiты ў Мiнскi касцёл святых Сымона i Алены. Для нас мае асаблiвае значэнне i тое, што кардынал Тарчызiа Бартане ўзначалiць цэлебацыю асвячэння вуглавога каменя касцёла святога Яна Хрысцiцеля ў сталiчным мiкрараёне Серабранка. Гэта першы касцёл, якi будуецца ў Мiнску за апошнiя сто гадоў. У апошнi дзень вiзiту запланаваная Iмша ў мiнскiм архiкатэдральным касцёле.

Але госць з Ватыкана знойдзе час для сустрэч з вернiкамi не толькi ў Мiнску, але i ў Пiнску i Гродне. Ён сустрэнецца з грэка-каталiцкай супольнасцю, а таксама з моладдзю — Кардынал Бартанэ ўмее размаўляць з маладымi людзьмi яшчэ i таму, што сам прафесар, выкладаў ва ўнiверсiтэце. Пра яго гавораць, што ён увогуле чалавек рухавы, даволi часта бывае ў розных паездках. Ён не адарваны ад жыцця i шмат чым цiкавiцца. Напрыклад, з’яўляецца прыхiльнiкам "Формулы-1" i футбола, будучы архiбiскупам, нават быў футбольным каментатарам.

Што такое Беларусь, кардыналу не трэба будзе тлумачыць. Ён не першы раз прыязджае ў Мiнск, быў тут напрыканцы 90-х гадоў. I архiбiскуп Тадэвуш Кандрусевiч яго добра ведае яшчэ з часоў свайго служэння ў Маскве, дзе кардынал Бартанэ таксама быў з вiзiтам, праўда, не з дзяржаўным. Цяпер жа ўсё iдзе на iншым узроўнi — госця запрасiла найперш дзяржава.

— Гонар для дзяржавы прымаць высокага госця з Ватыкана, — падкрэслiў Уладзiмiр Ламека, намеснiк упаўнаважанага па справах рэлiгiй i нацыянальнасцяў. — Сёння iдзе актыўнае супрацоўнiцтва органаў дзяржаўнай улады i ўлады духоўнай, асаблiва з традыцыйнымi канфесiямi. Яшчэ 20 гадоў таму рэспублiку называлi "палiгонам атэiзму". Сёння яна адраджаецца, кожны вернiк шукае дарогу да свайго храма.

Паводле газеты “Звязда”