Прэзэнтацыя зборніка аўдыёказак

Прэзэнтацыя зборніка аўдыёказак серыі «Беларускія народныя казкі» адбудзецца 8 чэрвеня ў мінскім кінатэатры «Перамога».

Такі зборнік будзе выпушчаны ў Беларусі ўпершыню. У запісе прымалі ўдзел радыёвядоўца, пісьменніца Тамара Лісіцкая, мастацкі кіраўнік дзіцячага калектыву «Калыханачка» Людміла Рыжкова і музыка Алег Хаменка.

«Казкі — гэта цудоўныя ўрокі культуры і сацыялогіі, у іх выкладзена ўся праўда пра нас — людзей. Ніводны герой не з’яўляўся проста так — на тое яны і народныя казкі, каб характарызаваць настроі і асаблівасці рэальных людзей», — адзначыла Тамара Лісіцкая.

У праграме прэзентацыі — чытанне казак удзельнікамі праекту, музычныя нумары і дэманстрацыя мультыплікацыйных фільмаў для дзяцей на вялікім экране.

Прэзентацыя серыі дыскаў пройдзе пры падтрымцы Дзіцячага фонду ААН (ЮНІСЭФ) у Беларусі.

Пачатак а 13-й гадзіне. Уваход вольны.

Паводле “Нашай Нівы”