Алесь Камоцкі: «Першы канцэрт на шостым дзесятку»

10 чэрвеня ў малой зале канцэртнай залы "Мінск" адбудзецца канцэрт вядомага паэта і барда Алеся Камоцкага. На ім будзе прэзентаваны новы дыск Алеся "З бацькоўскай кружэлкі". У дыск увайшлі вядомыя яшчэ за савецкім часам шлягеры, перакладзеныя бардам на беларускую мову.

"Гэта будзе цікава, — запэўнівае Камоцкі. — Такім прыхільнікі маёй творчасці ўбачаць мяне ўпершыню. Хаця б з-за таго, што гэты канцэрт будзе першым для мяне на шостым дзесятку..." (9 чэрвеня Камоцкі адсвяткуе 50-гадовы юбілей).

Выконваць кампазіцыі Алесь будзе ў суправаджэнні жывой музыкі. Да ўдзелу ў канцэрце запрошаны барабаншчык, саксафаніст, гітарыст і клавішнік. А цвіком вечара абяцае стаць выкананне песен з альбома 2009 года.

"Гэта будзе сюрпрыз для прыйшоўшых, — працягвае бард. — Пакуль няма ні канцэпцыі будучага альбома, ні нават яго працоўнай назвы. Затое ёсць абсалютна новыя песні, якія я нідзе не спяваў".

Паводле “Народнай Волі”